Program Nyadung Bantu Tusu Tepung ditampung baru

SARATOK: Program Nyadung Bantu Tusu Tepung ari Sapit Menteri Pengeluar Kuasa enggau Pengeraja Asal, Ali Biju ditampung ba Rumah Kuchun,Jabey ditu, ensana (15 Ogos 2020).

Sepenyampau 34 anak mit udah nerima bantu ungkup pejalai serak iya nya 29 iku ari Rumah Kuchun,Jabey Baroh enggau lima iku ari Rumah Rawing, Jabey Atas.

Ku Ali, iya seruran beratka pekara pengelantang peranak rumah panjai kelebih agi sekumbang pandemik Covid-19 lalu rayat napi penusah berindik ari atur dipejalai perintah kena nagang igi penyakit nya ari majak ngerekai.

“Bala penerima ke udah dikelala deka nerima bantu tu chara berenggat laban kitai ngasi Atur Standard Pengawa (SOP) ditetapka perintah.

“Nya alai aku ngarapka bala ke apin nerima bantu tu sabar nganti sereta seruran nyaga pengelikun enggau pengerai diri.

“Patih diri empu enggau kita sebilik ngemeranka chara idup baru baka dipadah piak opis pengerai,” ku iya ngelalau.

Jaku Ali nya disebut pengari iya ari Palan Servis Komuniti Sitak Parlimen Saratok rambau atur pengawa nya.

Iya mega muji peranak dia ngasika atur bekenaka sengkabung mua lalu nulis nama ba bup ti udah disedia baka udah dipadah.

Dulu ari nya, semua sida ke datai mega bisi diberi sengkabung mua ari palan servis ungkup penglikun sida.

Pengari ke datai mega udah nyuaka tambai Jalur Gemilang ngagai Tuai Rumah Kuchun beserimbai enggau pengerami ngintu Bulan Kemerdekaan menua kitai.

Tuai Rumah Kuchun ngarika semua penerima ngena peluang nya meri besai terima kasih ngagai Ali ke udah gerah jari meri bantu ke patut ngagai rayat.

Ku iya, taja bantu nya mit tang mai reti besai kelebih agi ngagai ruang bilik ke bisi anak mit lebuh napi penusah ke nyadi diatu.

Nya alai iya ngarapka Ali ulih nampung bantu nya ngagai bala bukai ti beguna bantu ngambi ulih nyaup ngelempung tating belanja sida.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak