Temegah kompleks digaga, asaika bemimpi

Penumbuh Kompleks Lumba Balai Ringin endang sigi dianti-anti peranak ba sitak nya ungkup pemaik bala nembiak sida dalam pekara lumba.

Suara Sarawak bisi nanya penemu bala ketuai ti diau ba sitak Balai Ringin sentang penumbuh kompleks lumba ke beungkus RM10 juta.

1) Pemancha Peter Mooney Linggau

“Penumbuh kompleks lumba tu baka dalam mimpi ba aku. Nyadi siku pemancha ari Pelilih Menua Simunjan aku berasai temegah laban kompleks lumba ti deka digaga tu chukup besai sereta manah. Pia mega, kompleks nya digaga seikas entarabansa. Terima kasih ngagai pengari rayat enggau Perintah Sarawak ti udah meri mayuh pemansang ngagai kami. Aku deka bebendar ngasuh peranak ba baruh aku ila nyaga kompleks nya enggau manah.”

2) Tuai Rumah Antony Lama Bungkol

“Penumbuh Kompleks Lumba Balai Ringin tu endang sigi dianti-anti kami. Aku tuai rumah ari Kampung Sepan, Balai Ringin selalu meda bala nembiak ba kampung aku nyereta pekit lumba ti diatur sekula sida. Tang penanggul ti ditapi sida diatu iya nya bedau bisi palan ti engkeman endur belatih baka main futsal enggau main bol. Udah kompleks tu tembu ila, dia sida deka nyamai agi belatih laban palan nya ila disikap enggau perengkaguna ti baru. Pia mega, kompleks tu ukai semina ungkup kami ditu aja, tang ulih dikena semua orang.”

3) KK Mohd Idris Manap

“Aku nyadi Ketuai Kampung Melayu Balai Ringin ti mega nyadi Chairman Kelab Nembiak enggau Lumba ditu berasai gaga sereta enda sabar nganti Kompleks Lumba Balai Ringin nya tembu. Lebuh kompleks nya udah tembu ila, mayuh aktiviti enggau lumba ulih diatur kami ke pemaik nembiak rebak baru ba kandang menua tu. Pia mega, penumbuh kompleks nya tau ngasuh kaul entara kampung lebih rat. Ba genturung Balai Ringin ditu aja bisi urung 30 buah kampung ti majoriti bansa Iban enggau Melayu. Nya alai, kompleks lumba tu endang beguna amai ngagai kami lalu endang udah lama dipinta. Kompleks tu ila mega ulih narit ati bala nembiak ngaul diri enggau pekara lumba baka main bol enggau futsal.”


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak