KUCHING: Kuching Skills College (KSC) bekerejasama enggau Asia Drone Technical Academy mai Program Latih Jeragan Drone ti sikar ngagai Sarawak.

Ketuai Pemesai Eksekutif iya, Novert Sullang madah, model program latih mungkur semua pekara nya dikumbai Certified Drone Operation, Maintenance, Aerial Suveillance Proficiency.

Ku iya, tu latih pengelandik beguna amat ti patut dikembuan orang ti deka nyadi pedagang tauka pengemeran teknologi drone tu.

“Kami betuah amat laban diberi peluang meda enggau belajarka chara bekenaka teknologi drone enggau meruan sereta likun ari siku jeragan drone tebilang menua, Geoffrey Lee enggau Alvin Chai.

“Bala penyereta diberi 14 hari belajar nerebaika drone, latih maneuver pemun dataika landik kelimpah belajarka chara bekenaka drone sida,” terang iya.

BEDUA PENEMU… Dr. Lee Beng Yong nibarka jaku ajar ngagai bala penyereta kus.

Novert dirandau Suara Sarawak pengudah bejadika Pengawa Nyuaka Setipikit Kus Drone ngagai bala penyereta, kena Hari Enam nyin tadi.

Iya madah, kus drone tu kebendar diatur nadai bebayar ungkup peranak Sarawak ke nadai kereja, putus pengawa tauka diketu pengaji ketegal Covid-19 tu tadi.

“Nengah kus tu, KSC ngarap sida disikap ngena pengelandik baru dikena muka runding ngena penemu enggau pengelandik baru maya bepintaka kereja bukai udah tu.

“Baka udah dipadah tadi, kami dekaka raban nembiak chakah ngaul diri ba servis langit (drone) nengah latih bekaul nipakka juluk Kepala Menteri Datuk Patinggi Abang Johari Tun Openg ba pemansang teknologi digital,” ku iya.

Berita penuh tau dibacha ba Ruai 8 pagila.

BAKA TU… Siku ari penyereta belajarka chara ngelekat kereban drone.