SIBU: Siku indu kempang mantap laki diri empu pengudah ngeransi laban nuduh laki iya bisi gila enggau indu bukai, Hari Satu nyin tadi.

Ketuai Polis Pelilih Sibu, ACP Stanley Jonathan Ringgit madah, saspek beumur 27 taun nya mantap laki iya, 28 taun, ngena duku ba penusah ke nyadi urung pukul 10 malam.

“Penusah dipelaba nyadi ba rumah suwa seduai di Jalai Amoy ditu.

“Dulu ari nya, seduai melaki bini belaya pengudah saspek nagang laki iya mindah ke bukai ketegal disangka gila enggau indu bukai,” ku iya ba sebengkah penerang berita, ditu tadi.

Stanley madah, saspek nyau enda liat ati pengudah belaya lalu nyingkau duku sereta enda chechamang mantap pala laki iya tang ulih disilat.

Taja pia ku Stanley, lebuh nyilat ari kena pantap nya, duku tadi nyau kena lengan enggau kaki ngujungka tudah tuai balat bakal,” ku iya.

“Piak kami udah ngasuh Unit Polis Nginau (MPV) ngesah ngagai endur penusah nyadi pengudah sida nerima kangau ari bala lelaki ke bakal pasal penusah nya.

“Polis mega udah ngerampas duku ba endur penusah nyadi lalu lelaki nya ditaban ngagai Sepital Sibu ngambika diperubat.

“Kes dipansik di baruh Seksyen 324 Kanun Keseksaan seraya saspek diatu benung direman,” tambah Stanley.