KUCHING: Teknologi drone majak diterima enggau dikena ba mayuh bengkah sektor industri menua tu.

Ketuai Pemesai Eksekutif Kuching Skills College, Novert Sullang madah, kolej sida bejalaika inisiatif meri Program Latih Jeragan Drone ungkup raban diselinting.

Ku iya, laban sedarka pemesai guna teknologi nya kemaya hari, piak kolej naka ulih mai raban bekaul baka Bomba enggau Penyah Penusah (JBPM) ba program latih dipejalaika sida.

“Serak tu kami udah ngangauka raban ari JBPM Sarawak betuaika Nik Muhammad Afiq Nik Roslan, iya nya Ketuai Pampang Ba Pekara Pengelikun Penusah Angus, Opis Bomba enggau Penyah Penusah, Indu Opis Sarawak.

“Entara licha dikunsi iya, pasal pengawa bekenaka drone ba opis sida kelebih agi maya ngesah penusah angus enggau operasyen nyidi enggau nyelamat (SAR) dalam kampung,” terang Novert.

Nambahka nya, Pemesai Kanan Operasyen JBPM Sarawak, PgKB II John Sagun Francis enggau tim iya bisi nunjukka chara sida bejalaika SAR ngena drone.

“Ari penerang dibai drone, kitai ulih nyidi enggau nyelamat orang ti bakal tauka lenyau, enda masau jam enggau belanja bejalaika SAR,” ku Novert ngelansa penerang dikunsi John ba licha ya.

Berindik ari nya, KSC nengah kerejasama rat enggau JBPM Sarawak ngarapka penemu dikunsi sehari nya tau nyadika lalau enggau peransang ngagai raban nembiak belajarka teknologi drone tu.

NGEMBING… Nik Muhammad Afiq benung nerang pasal guna drone ba operasyen sida.

 

KENANG KAMI… Bala penyereta kus begambar enggau raban Bomba rambau atur program sehari nya.

 

KE PENGINGAT… Novert nyuaka tepa ngagai Nik Muhammad Afiq pengudah tembu licha.