SONG: Tanah kena renchah projek jalai tetap dibayar pampas ngena chara berenggat enggau penyampau ke patut.

Menteri Dagang Dalam Menua enggau Pekara Pengguna (KPDNHEP), Datuk Alexander Nanta Linggi madah, genap projek dipejalai enti bisi ngerenchah tanah rayat sigi dipampas.

Ku iya, rayat anang irauka tanah diri direnchah projek pemansang baka projek ngaga jalai laban perintah sedia mayar ganti rugi ti ditanggung sida.

“Ambika chunto, Projek Ngaga Jalai Nanga Makut/Nanga Engkuah Katibas Song urung 2 kilometer (km) pemanjai ti ngerenchah tanah 16.8786 hektar nyengkaum 16 Lot Tanah Adat Bansa Asal (NCR).

“Sekeda kita ke dikangau kitu sehari tu deka nerima chek bayar pampas ba tanah kena renchah projek jalai baka udah dipadah ,” ku iya.

TERIMA KASIH… Penerima chek bayar pampas tanah begambar enggau Nanta pengudah pengawa tembu.

Nanta ti mega Kaban Parlimen Kapit mansutka jaku nya ba Pengawa Nyuaka Chek Bayar Pampas Tanah ngagai 18 pengempu tanah, ba Balai Komuniti Song, ditu kemari.

Iya madah, projek jalai udah berengkah dipejalai dalam bulan Oktober 2019 lalu disadang tembu Disember 2021.

“Projek tu deka meri pengelantang ngagai peranak ari 20 buah rumah panjai, tiga buah sekula, dua buah klinik enggau dua Agriculture Substation.

Berita penuh ba Ruai 2 pagila.