KUCHING: Opis Tanah enggau Survei Malaysia (Japem) nangguh dulu pengawa nyukat enggau ngerintis adan menua Malaysia-Indonesia lalu pengawa tu deka ditampung baru pengudah pandemik Covid-19 punas.

Sapit Menteri Pengeluar Kuasa enggau Pengeraja Asal, Ali Biju madah, pengawa nya ditangguh dulu dikena nyaga pengelikun staf Japem ari dirampit Covid-19 maya bejalaika pengawa.

Terang Ali, Japem ti nyadi ejensi di baruh opis menteri iya diatu benung nembuka pengawa ngerintis adan menua Indonesia enggau Malaysia.

“Pengawa ngerintis tu dipejalai begulai enggau piak menua Indonesia kenyau ari 9 September 1975 lalu tembu kena 20 September 2001 ke alai 1979.3 kilometer (km) ari 2,067 km udah disukat enggau dirintis.

“Naka diatu, bisi 22 Sempekat Pemereti Ati (MoU) udah disain entara kededua menua lalu pemadu baru kena 21 November 2019.

“Pengawa ngerintis adan 87.7 km pemanjai diatu agi diperunding ngaul isu ngaul tujuh Outstanding Boundary Problem,” terang iya.

Ali mansutka jaku nya lebuh nyaut tanya Senator Datuk Paul Igai pasal status pemadu baru pengawa nyukat adan menua Malaysia-Indonesia nyengkaum pemar ditapi Jupem sekumbang gawa ba Aum Kedua Penggal Ketiga Parlimen, ditu tadi.

Iya ti mega Kaban Parlimen Saratok madah, Jupem bempu tanggungpengawa bejalaika pengawa nyukat enggau mali baru tiang pul entarabansa ti lenyau, rusak tauka tekebu ari endur asal lalu mayuh pemar ditapi sida.