KUCHING: Minyak sawit ulih diproses nyadi minyak biojet ti dikena bilun, ku Willie Mongin.

Sapit Menteri Pengawa Bekebun enggau Komoditi nya madah, siti pansik udah dipejalai ba menua China dikena proses minyak biojet ari minyak sawit.

“Kami mega udah bejalaika pansik ari bantu sekeda palan pelajar tinggi ba pengawa ngaga minyak biojet tu.

“Bilun ulih terebai ngena minyak sawit, baka ngena minyak kerosin ke diatu,” terang iya.

Willie mansutka jaku nya rambau Program Jom MSPO Nengeri Sarawak di Dewan Rentap Pulapol, Kuching tadi.

Iya madah, enti biofuel ulih digaga, tentu rega minyak sawit mega deka niki.

“Tu berita manah ngagai pekebun sawit di Malaysia kelebih agi sida ke bisi dandang tanah ke ami,” terang iya.