Presiden Gerempung Veteran Soldadu Kor Renjer (PVTKR) Lt. Kol (B) Mohd Melintang Abdullah, 62 bekunsika jerita enggau penemu iya sekumbang ke agi gawa enggau Raban Soldadu Malaysia (ATM).

Nusui penatai diri Melintang madahka iya asal ari Rh Ritchell, Kampung Selanjan, Sebembam, Lachau, Sri Aman. Niang apai iya Milet Anak Sigan enggau indai iya, Tuna Anak Gawan mega asal ari Selanjan.

Iya ada kena 31 Disember 1958 lalu kenyau ari mit iya siku orang ke endang ngembuan juluk ti tinggi deka mujur ba pelajar

Maya agi mit, iya ngembuan juluk ati deka nyambung pelajar ngagai tikas ti tinggi, taja pia juluk ati iya tejanggal ketegal penanggul nadai belanja.

Taja pia, penanggul nya nendurka semengat iya nyabung pengeran ati deka teulihka pemujur ba pengidup.

MAYUH PENGINGAT….Melintang nusui pengingat maya agi gawa nyadi soldadu.

Melintang terus ngeransing diri begigaka pengawa pengudah nembuka sekula ba Pom Lima.

Maya umur manggai 18 taun, Melintang diterima gawa nyadi soldadu darat.

Pengudah abis latih kus Pegawai Kadet Tentera ba Maktab Tentera Diraja, Sungai Besi, Kuala Lumpur iya terus dianjung gawa ba Pulau Pinang.

Melintang diberi pangkat nyadi Leftenan Muda iya nya sebengkah tanggungpengawa ke besai ba renggat pengawa soldadu taun 1977.

Gawa enggau United Nation

TANDA BASA…Melintang maya nerima Medal Parade UNMEE ari siku Pemesai Tinggi Soldadu dalam United Nation.

Asil ari pengeransing enggau penyikar ngereja pengawa, dia Melintang dipilih gawa enggau United Nation (UN) pengelama tujuh taun.

Tu mih pekara ke balat ngemegah laba iya entara siku pegari ari menua kitai Sarawak nyadi orang keterubah dipilih gawa enggau UN.

Maya agi gawa nyadi soldadu, apai ngagai empat iku anak tu kala ngiring siti plantun ke ngundan 36 iku kaban ke dijaga. Iya mega diasuh nyadi ketuai batalion enggau nyadi pemesai staf ba renggat pemadah.

Taja udah pinchin, tang Melintang meruan regas sereta agi tau gawa ba dedini opis. Berekat ari pengeregas enggau penau diri ngujungka iya dipilih mangku pengawa nyadi Direktor Bagi Pengelikun, Unimas kenyau ari taun 2015 nyentuk diatu.

Lebuh ditanya pemberita bekaul enggau pemar ke ditapi diri sekumbang ke agi gawa nyadi soldadu, Melintang madah lebuh nyadi ketuai ti ngiring orang endang ukai pengawa ke muntang.

REGAS DALAM NGO….Melintang ngarika PVTKR nerima agih belanja ari Menteri Muda ba Opis Kepala Menteri (Undang-undang enggau Adat Bumiputera) Datuk John Sikie Tayai.

“Lebuh nyadi nyadi ketuai kitai ngaul mayuh orang sereta bemacham perangai orang ke dijaga.

“Siti ari pemar diasai maya nyadi ketuai bepun ari renggat baruh nyentuk ke tinggi iya nya bakani kitai deka orang baruh ninga tauka taluk ngagai kitai awakka sida sanggup nitih jaku tauka sebarang pengawa ke diberi.

“Kesatu, kitai ketuai mesti nunjukka diri nyadi chunto ngagai orang baruh enda ngira ari semua sukut baka ari sukut fizikal, pemerani, enggau penau sereta penemu ti dikena ngelaban bala munsuh enda ngira maya operasyen tauka maya belatih,” ku iya.

“Taja maya belatih, pengelikun sigi sempama ba ujung tanduk. Tu sebaka enggau maya menua ti benung charut, kitai enda nemu kemaya munsuh ulih nyerang.

“Nya alai, kitai patut seruran betati tauka bejimat maya menua likun laban munsuh ti datai iya enda ngira maya. Ulah bejaga baka tu beguna amat awakka ulih ngurangka pemedis tauka penyampau nyawa bebadi ketegal ngetanka menua.

PENGAWA PVTKR…Melintang (dua kanan) begulai enggau bala kaban PVTKR rambau ngabas siku veteran soldadu nyerumba Hari Bujang Berani ba pun bulan Ogos tu tadi di Batu Kawa. Bela datai Lt Jeneral (B) Datuk Stephen Mundaw (tiga kiba).

“Nyadi, lebuh pengelikun menua enda tentu, kitai patut ngaga pemutus ti betul laban kitai bisi ngiring orang dibelakang kitai.

“Enti ilap mimit, iya sigi tau ngasuh nyawa bebadi tauka bulih pemedis, tu meh siti pemar tauka penguji lebuh kitai gawa nyadi ketuai perang jeman nya suba.

“Maya jeman kami gawa suba, semua operasyen sigi dipejalai dalam babas magang.

“Maya jeman Komunis mega, chukup mayuh ‘boom trap’ ditan sebelah babas ngujungka kami ngiga akal baka ni ngaga pemutus ke betuldi kena nyeliahka penusah enda disadang.

Pengawa ngelanggur tauka ngaga pemutus lebuh benung beperang siti penanggul ke ditapi Melintang jeman nya laban utai dilanggur sigi enda kala engtap.

“Taja manah ni pengawa udah dilanggur, tang pemutus ke udah digaga sigi bisi aja betukar lebih agi ti maya bedengah.

PENYIKAR NGAGA PEMUTUS

“Nyadi ketuai patut sikar enggau nemu ngaga pemutus ti betul. Kekadang bisi aja pengurang maya bejalaika pengawa ba opis, belatih enggau maya operasyen, laban enda semua utai ti kedeka ati nya mujur dijapai.

“Kitai patut sikar ngereja pengawa awakka nyapai misyen enggau tuju taja bisi pengurang laban enda selalu utai deka dijapai kitai nya semampai nyadi.

“Taja pia, anang meh kitai nguna nya nyadika dalih ti ngasuh pengawa nyapai misyen enggau objektif puntan,” ku lalau iya.

Melintang kla nerima mayuh anugerah enggau midul basa ke besai baka empat kali nerima anugerah laban nyulut enggau pengawa ba ATM.

Entara midul ke kala diterima iya nya Ahli Bintang kenyalang, Ahli Bintang Sarawak enggau Panglima Bintang Kalang ari Perintah Nengeri Sarawak, Ahli Mangku Perak ari Perintah Nengeri Perak enggau Kesatriaan Mangku Negara ari Yang di-Pertuan Agong Malaysia.

PENGAWA NGELABAN KOMUNIS

Sebedau serakup Malaysia ditumbuh dalam taun 1960an, raban soldadu nyengkaum British Army, Sarawak Iban Tracker, Sarawak Renjer, Malay Regiment endang begulai ngetanka menua ari keruga bala komunis.

“Ba taun 1989, menua kitai balat charut munaska keruga bala komunis tang pengujung iya kitai mujur ba perang dalam kampung ngena mayuh macham chara dikena ngelaban bala munsuh maya nya.

“Aku kala enggau operasyen militari enggau beperang dalam kampung ngelaban bala komunis ba entara garis menua Malaysia-Thailand.

“Ngena mayuh macham chara ngelaban bala munsuh ngujungka piak Parti Komunis Malaya nyerah alah urung taun 1989.

“Ukai semina kala ngelaban bala komunis ba entara garis menua di tanah diri empu, aku mega kala dianjung gawa nyereta Pertubuhan Bangsa Bersatu (PBB) di sebarang menua ke benung beperang maya nya,” ku iya.

Beserimbai enggau Hari Kebangsaan ke disambut semua rayat Malaysia di selampur menua seharitu, dia Melintang bekunsi lansa kenang bekaul enggau penyarut menua sebedau ke ulih merintah kediri.

“Maya agi dipegai perintah British, rayat di menua tu chukup tusah ngidupka diri.

“Tambah mega menua maya nya benung dikachau Parti Komunis Malaya ti bebendar nyakal penumbuh Malaysia.

“Sebedau mujur merintah diri, menua kitai mega kena kachau perintah Indonesia ti ngena rambai jaku ‘Ganyang Malaysia’.

“Ukai semina nya, mayuh agi penusah bukai ditapi rayat nyengkaum raban pengelikun menua ti sanggup berambunka nyawa ungkup pengelantang anak uchu ti nguan menua tu,” ku iya.

PENYARUT DALAM MENUA

Tandu Melintang pengudah taun 1989, penyarut dalam menua kitai bisi nyadi baka penyarut Memali ke ngaul pengawa aktivis jalai pengarap.

Penyarut bukai ke kala ditapi menua kitai mega baka ke nyadi ba taun 2013, pengawa munaska keruga raban penyelawai ke datai ari Filipina ngachau menua Lahad Datu, Sabah.

“Penyarut di Lahad Datu mai kelai ke semampai dikeingatka maya tu laban orang luar deka ngerampas menua Sabah.

“Ba penyarut nya, sekeda raban penyaga pengelikun bebadi nyawa.

Nya alai, Melintang ngelalau rebak baru patut belajar ari sejarah ke udah nyadi lalu besaup nyaga menua tu enggau manah awak enda mudah kena kachau orang luar.

Pengelantang enggau pengelikun ukai pekara bemain, iya begunaka pengeransing ati enggau kerejasama ari semua piak.

Berebak enggau nya, kitai mega patut seruran ngenang sereta ngingatka jasa bala ex-soldadu menua ke udah bebendar ngetanka pengelikun menua enggau ngulihka buah merdeka ari pegai perintah luar, ku Melintang.

Nangkan nya, orang politik mega patut meretika pengawa ngetan ka menua ukai pengawa ke muntang, nyadi sida patut meransang nembika rebak baru terus siru sereta ngetanka pengelikun menua tu.

“Enti orang politik enda bebendar meri lalau ti manah, pengawa nya deka mai pengerugi ngagai kitai,” ku iya.
Nya alai, semua rayat Malaysia patut mangku tanggungpengawa ke berat ke pemaik enggau pemansang menua tu.

“Anang sesekali betalatka pekara pengarap laban Malaysia merambu deka nyadi menua maju ke ngembuan penatai pemisi tinggi jemah,” ku liya.