SARATOK: Dibai ati angkunka pengawa ngaga asil pengelandik jari, dia Sandra Macha meransang diri empu nitihka singkang orang bukai ti udah dulu nyulut.

Peranak asal Lubok Renit nya madah, ati ransing amat deka nunda pemanah asil jari kelebih agi leka manik ditusuk nyadika tangu tauka mariek empang ku jaku orang tunga Saratok ditu.

“Laban sigi chukup rinduka pengawa nusuk manik tu, nya kebuah aku meransang diri empu nitihka singkang orang bukai ngangkatka diri ba pengawa tu.

“Tudah diri belubah-lubah belajar ngagaka diri buah tangu ari muntang nyentuk buah ke mar digaga,” ku endu Sandra ngepunka randau enggau Suara Sarawak.

Indai beranak dua nya madahka diri belaki nguai lalu diau sebilik enggau entua iya di Rumah Benedict Siggie, Kerupok Sematong ditu.

ALUS… Sekeda ari asil tangu digaga Sandra.

Sandra madah, keterubah iya bulih penemu nusuk tauka begagaka tangu iya nya bepun ari bala pangan enggau bala ipar ka sama bisi ngembuan pengerindu begagaka tangu.

“Kelimpah ari nya, aku mayuh agi bulih penemu sereta bungai buah tangu ari Facebook enggau ruai (group) whatsapp asil jari digaga ari manik.

“Baka ke diatu, aku mayuh agi belajar sereta nunda asil manik digaga bala pangan ti dikunsi sebelah ruai whatsapp enggau ba Facebook.

“Nambahka nya, aku mega suah bekunsika chura bungai tauka buah tangu enggau bala pangan ke beserimbai pendiau enggau aku ba rumah panjai,” lansa Sandra.

Iya madah, buah tangu ke suah dipinta bala enggau ke suah digaga iya empu iya nya tangu buah naga, tangu buah suntung, tangu bungai 3D enggau tangu merundai.

MANDING DIPEDA… Sandra nguji ngerasuk tangu digaga iya empu.

Kelas ngaga tangu baka ke diatu, Sandra semina nunda ari buah tangu ari ruai whatsapp aja, berandau enggau beduaka sekeda penemu nengah online.

“Bisi sekeda bala kami ke dalam ruai whatsapp nya endang nadai kala betemu tauka berandau betunga mua enggau pangan diri laban diau jauh ba menua bukai.

“Nya alai, ruai whatsapp tu tau dikumbai baka ruai endur kami betunga, berandau, betanya enggau bekunsi macham cherita pengudah lepa ari pengawa berintuka ruang bilik.

“Aku lebih agi nguji ngaga kediri nunda asil bala pangan ka udah sereta mayuh agi betanya ngagai bala pangan enggau bala ipar enti penemu agi rapas.

“Tambah mega bala dia enda rangka penemu lalu rindu ngajar enggau meransang pangan diri ngambi sama bulih asil ke manah enggau buah tangu manding dipeda.

LANDIK… Sandra mega bisi ngaga tengak moden.

“Tu mih ke ngasuh ati aku gagit agi deka mantaika asil jari diri sekalika ditunda bala bukai tauka ke peransang diri empu,” ku Sandra temegah meda asil jari diri.

Ngenang pasal pengawa bejualka tangu, Sandra baru deka nguji bejual asi jari nitihka peminta bala ke rinduka asil jari tauka buah tangu digaga iya.

Kelimpah ari tangu, iya mega kala ngaga sereta nyual asil manik bukai baka selampai, marik moden, necktie, sementing manik enggau selap mija.

“Rega siti-siti tangu digaga aku bepanggai ba pemisit bungai tauka buah enggau pemesai tangu ke diudar laban genap buah tangu digaga enda sebaka pemar.

“Bansa manik dikena mega deka nentuka rega tangu digaga aku laban ngira ungkus enggau bekal manik ba makit.

TEMEGAH… Siti ari keranjai jari Sandra udah dipilih piak Kuching Skills College nyadika tepa ngagai temuai dipebasa, Dato Sri Doris Brodie.

“Baka dipadah aku tadi, rega tangu diletak aku enda sebaka, berengkah ari RM350 ngagai RM500 siti,” terang Sandra.

Nya alai ku iya, barang sapa ka nemu silik agi pasal asil jari tau nganjung pesan nengah whatsapp tauka telefon ngagai lumur 01136443456.

Kelimpah ari nya, kita tau mega ngelawa Facebook iya empu iya nya Sandra Lema Ab Kibi-Kibi.

“Juluk ati aku ngarapka pengawa begagaka asil manik ngena motif Iban ulih diangkat sereta dikelala serata dunya, ukai semina tebilang dalam menua Sarawak aja.

“Kepenudi, jaku peransang aku ngagai bala rebak baru. Aku arapka sida ulih mupuk pengerindu belajar begagaka asil pengelandik Iban kelebih agi asil jari manik baka tangu.

“Kebuah pia laban tangu tu siti ari rengka ngepan Iban dikena raban ke indu ari kelai.

“Aku mega ngarapka pengawa tu enda dilengka pia aja, sama mih kitai ngetanka pengawa begagaka asil jari kitai Iban awak ulih mansang tebilang baka bansa bukai,” ku Sandra nyimpul randau.