SEMATAN: Parti Rayat Bersatu Sarawak (SUPP) nganjung rintai nama chalun ke udah dipilih ngagai Kepala Menteri (KM) Datuk Patinggi Abang Johari Tun Openg ungkup 20 iti penuduk asal ari parti nya ba Pengawa Bepilih Nengeri Ke-12 (PRN12) deka diatur enda lama agi.

Presiden SUPP Datuk Seri Dr Sim Kui Hian madah nama chalun parti nya deka dibantaika Abang Johari ke mega Chairman Gempung Parti Sarawak (GPS) enti udah datai maya iya.

“Aku udah suah betemu sereta berandau enggau Kepala Menteri, dia kami udah mantaika chalun ungkup 20 penduduk asal SUPP tang bedau diputus.

“Kepala Menteri enggau aku deka mantaika nama chalun ke dirintai nya ila,” ku iya lebuh dirandau pengudah bejadika Bilik Operasyen GPS Opar di Kampung Tebaro, ditu kemari.

Lebuh ditanya nama kebuah chalun bedau diputus, Dr Sim nerang laban sida deka meda dulu gaya politik
lalu nganti maya engkeman sebedau ngaga pemutus.

“Ambika Chunto, enti pengawa bepilih besai seretai enggau pengawa bepilih besai i, kami nyangka deka
nukar baru chalun ke udah dirintai ungkup Dun bediri ungkup sitak Parlimen lalu aku deka ngiga chalun bukai ungkup Dun.

“Nya nyema pengawa bepilih besai ngenyit diatur seretai enggau pengawa bepilih nengeri. Aku enda nemu,” ku iya.

SUPP ngembuan 20 penuduk asal ungkup Dun iya nya Opar, Padungan, Pending, Batu Lintang, Kota Sentosa, Batu Kitang, Batu Kawa, Mambong, Simanggang, Engkilili, Repok, Meradong, Bukit Assek, Dudong, Bawang Assan, Pelawan, Tanjung Batu, Piasu, Pujut enggau Senadin.

Taja pia, parti nya dipelaba deka lenyau penuduk Mambong laban penyandang Datuk Dr Jerip Susil diatu nyadi kaban Parti Pesaka Bumiputera Bersatu (PBB).