KUCHING: Hope Place Kuching meri kerusi roda ngagai siku pesakit mati tubuh sepiak ti diau sebatang kara di Batu 24, apin lama ke udah.

Sida udah nerima berita pasal aya Embrose@Dorek Rigud ti diau kediri begunaka bantu nya, suntuk belanja deka meli laban nadai kereja.

Raban Hope Place udah ngatur pejalai nganjung bantu seraya ngabas aya Embrose ba rumah iya di Kampung Chupak.

Embrose kala gawa nganjung barang ba sektor peribit badu gawa pengudah ditepan penyakit nya kenyau ari lima taun ke udah.

Sekumbang ke sakit mega, tudah aya Embrose nyau enda ulih ngintu enggau mela diri empu, enda dapat mindah ke bukai, jauh agi enti disebut gawa ngiga belanja.

Taja iya bisi dua anak ti udah nirika ruang bilik diri empu tang seduai nya diau jauh ari aya Embrose, ba genturung pendiau ke bukai lalu jarang pulai ngabas tudah tuai.

Nasip endar menyadi tuai ke lelaki enggau ke indu beserimbai pendiau enggau iya lalu ngabas tudah ninting hari, nganjung pemakai enggau berintuka utai ba rumah iya.

Seduai tu mih ke kiruh berapi, ngupas kandang ngelingi rumah enggau dalam rumah sereta beranjungka tudah ke sepital lebuh datai hari iya beperesa.

Aya Embrose enggau sida menyadi beridup enggau pengawa bumai betaun dataika ulih mansutka belanja enggau pemakai sida sebilik.

Dulu ari nya, Hope Place udah nerima kangau ari mensia mayuh ti minta raban nya mantu orang ti beserimbai pendiau enggau sida di Jalai Kuching-Serian ditu.

Kelimpah ari kerusi roda baru, bantu pemakai sekali beri mega bisi diberi ngagai aya Embrose.

BESAI RETI… Raban ari Hope Place ngabas aya Embrose ba rumah iya.