SONG: Sebuah stesyen minyak baru deka digaga ba sitak Engkabau semak Pasar Song.

Menteri Dagang Dalam Menua enggau Pekara Pengguna (KPDNHEP) Datuk Alexander Nanta Linggi madah, stesyen minyak deka digaga enda lama agi laban peminta udah bulih pemendar ari piak sida minggu nyin kemari.

“Tu siti berita manah ngagai peranak di pelilih Song laban piak KPDNHEP udah ngemendarka peminta ngaga stesyen minyak ba pelilih Song.

“Agih belanja ke kena ngaga stesyen minyak tu deka diberi ngagai Koperasi Pelilih Song, Kapit.

“Agih belanja udah dikemendar nya sigi ungkup kena ngaga stesyen minyak ti damping enggau pelilih Song, Kapit,” ku.

Nanta madah munyi nya rambau program nyuaka chek pampas tanah ngagai raban penerima ti diatur di Balai Komuniti Song kena 1 September tu tadi.

Stesyen minyak baru tu deka digaga ba genturung pendiau Engkabau, Song.