KUCHING: Mandal Chairman PBB sayap Pesaka, Datuk Seri Michael Manyin Jawong ngansak raban bansa Bidayuh ngetan lapan penuduk maya Pengawa Bepilih Nengeri (PRN) ke deka datai pengudah timpuh Dun abis ba bulan June 2021.

Ku Manyin, bisi lapan penuduk ngarika raban bansa Bidayuh lalu mesti ditan iya nya Opar, Tasik Biru, Serembu, Bukit Semuja, Kedup, Tarat, Mambong enggau Tebedu.

“Maya PRN ila, anang meda chalun tang peda mih lambang parti ke ulih mai pemansang enggau gawaka rayat.

“Kebuah pia laban GPS seruran ngemeratka rayat Sarawak nadai ngira raban bansa enggau jalai pengarap,” ku iya madah nyemetak.

Manyin mansutka jaku nya ba Pengawa Nyuaka Geran Buding Komuniti DBNA ti dipenyadika Kepala Menteri Datuk Patinggi Abang Johari Tun Openg ditu kemari.

Manyin ti mega Menteri Pelajar, Sains enggau Pansik Teknologi madah, raban bansa Bidayuh nya komuniti mit ke semina lapan peratus di Sarawak.

“Kitai deka majak mit enggau enda ulih begulai manah enti udah pambar.

“Nya alai, aku sanggup agi dipejah ba media rama tang pekara dikemerat aku diatu iya nya ngenegapka kaul penyerakup dalam komuniti Bidayuh,” terang Manyin.

Ku iya, nengah DBNA, tanah udah disukat ungkup lebih ari 100 genturung pendiau Bidayuh nyentuk bulan November taun nyin kemari.

Nambahka nya, Kepala Menteri mega ngemendar lima ikar tanah di Serian ngambi dikemansang DBNA.
“Nya kebuah kami deka ngaga 40 buah rumah kedai ba kandang menua nya,” ku Manyin.

Ngelansa pasal Buding Komuniti DBNA, Manyin madahka buding nya pemansang timpuh panjai ti ngemuntang peranak menua ulu ulih bemalam enggau rega minimum lebuh bisi pengawa ba mengeri.

Sama datai Presiden DBNA Datuk Ik Pahon enggau lapan pengari rayat sitak Bidayuh.