KUCHING: Dua gerempung ukai dikuasa perintah (NGO) iya nya Gerempung Anak Bulan Mirah (PBSM) Sarawak enggau Gerup Besilih Stok London (LSEG) udah bekerejasama nyuaka sekeda kereban nyaga diri (PPE) ngagai piak Sepital Besai Sarawak (SGH), pagi tadi.

Sapit Chairman PBSM, John Lam madah, bantu tu dikena nyaup staf opis pengerai ari sukut kereban ti diguna.

“Kami meri terima kasih ngagai piak LSEG laban nyaga pengelantang enggau mantu utai diguna raban gawa ba luan di menua tu.

“Kami ngarapka bantu tu ulih nangkup peminta staf opis pengerai ti suntuk PPE,” ku iya.
John mansutka jaku nya ba Pengawa Nyuaka Kereban Perubat ari LSEG enggau PBSM ngagai SGH ba Unit Sakit Raya (ICU) seharitu.

Iya ngarapka bantu kereban ti diguna tu ulih nyaup staf opis pengerai lebuh gawa ngubat pesakit Covid-19 ngambi nagang gelumbang ketiga ari nyadi ba menua tu.

Nangkan nya, piak LSEG madahka bantu nya sebagi ari Tanggungpengawa Rama Korporat (CSR) ari serikat sida.
Dulu ari nya, LSEG udah nyuaka bantu GBP 30,000 iti (RM155,940) ngagai PBSM Sarawak ungkup diguna raban gawa ba luar.

Tu nyengkaum 266 set PPE ICU, 565 set PPE ukai ICU, 658 set alat pernafasan kartrij enggau 2,000 iti sengkabung mua bansa N95 ngagai SGH.

Kelimpah ari nya, dikearap bantu tu ulih nagang pengerekai Covid-19 ngagai mensia mayuh enggau raban gawa ba luan.