SRI AMAN: Menteri Muda Pengelantang Komuniti, Datuk Francis Harden Hollis ngelalau bala rayat anang mendingka jaku ajum bala penyakal.

“Kita ba renggat baruh kelebih agi ke diau ba rumah panjai anang kiruhka jaku ajum disebut bala penyakal ti semina deka ngerachun runding kita aja.

“Sida nya sengaja nyebut jaku munyi nya laban kepapasaka pemansang dibai Perintah Sarawak kelebih agi ba menua Sri Aman ti dipegai pengari ari Gempung Parti Sarawak (GPS),” ku iya.

Harden mansutka jaku nya lebuh dipebasa bejadika AgriCOP ba Rumah Kadir Selai, Lepong Simpai Ili diatur Opis Betanam Betupi Pelilih Sri Aman ditu, tadi.

Ku iya, pengidup rayat menua tu berasai lantang ari buah pemansang sekumbang dipegai perintah lalu semua tu patut dikenang.

Nya kebuah ku iya, sukung tegut enggau kerejasama rat ari renggat baruh beguna amat nentuka perintah ke bisi diatu ulih nampung semua projek pemansang dilanggur.

Pia mega ba menua Simanggang ditu, projek pemansang pemansang semampai dipejalai ukai semina maya semak pengawa bepilih aja.