SARATOK: Urung 1,900 nerima pemaik ari Program Bantu Tusu Tepung ungkup sitak Parlimen Saratok ti benung chakah dipejalai diatu.

Kaban Parlimen iya ti mega Sapit Menteri Pengeluar Kuasa enggau Pengeraja Asal, Ali Biju madah, urung 600 penerima udah nerima bantu nengah program nya naka kemari.

Ku iya, bala penerima ke bukai deka nerima bantu sida nangkan tu laban pengawa enda ulih dipejalai berebak lalu disadung nitihka gintir menua ke udah dirintai dalam sistem.

“Naka diatu, kami ba Palan Servis Komuniti ditu udah nerima enggau ngemendarka 1,900 peminta bantu tusu tepung ungkup anak mit beumur enam taun enggau biak agi.

“Nambahka nya, peminta bantu tu mega udah ditutup lalu kitai deka nyadung bantu nitihka rintai penerima ke udah dikelala enggau udah bisi dalam sistem.

MANTU RAYAT… Tuai Rumah Ayom nyuaka bantu tusu tepung ngagai penerima seraya dikemata pengajar Catherine.

“Sida ke enda ampit bantu serak tu anang irau laban mayuh chara bukai dikena kita ngulihka bantu ari palan servis kami laban aku semampai beratka peminta kita,” ku iya lebuh dirandau Suara Sarawak.

Ali madah, Program Bantu Tusu Tepung tu sebagi ari chara dikena iya ngelempungka tating belanja apai indai ke bisi anak benung nusu sekumbang igi penyakit Covid-19 ngerekai ba menua tu.

Serak tu, tim Ali Biju nampung pejalai nyadung bantu tusu tepung ngagai peranak Rumah Ayom di Nanga Luau, Rumah Loya Seman di Kemidan Asal enggau Rumah Desmon Sungan di Kemidan Jaya.

Ali diarika pengajar Catherine Kupa Chuat disempulang raban ari Palan Servis Komuniti Sitak Parlimen Saratok udah nyuaka bantu ngagai 12 penerima ba Rumah Ayom, lapan Rumah Loya Seman enggau lima ba Rumah Desmond.