PADAWAN: Perintah Sarawak nengah Opis Betanam Betupi udah ngemendar agih belanja RM9 juta dikena bejalaika Pengawa Ngerembaika Program Betanam Betupi Ngaul Komuniti (AgriCOP) ba selampur Sarawak.

Program tu entara inisiatif Perintah nyapai juluk Sarawak nyadi palan tibang pemakai manggai taun 2030.

Sapit Kepala Menteri Datuk Amar Douglas Uggah Embas madah, program nya deka chakah dipejalai ba menua ulu ngena program tu baka teknologi betanam, ngurangka indu utai enggau pengawa betanam betupi ti meruan (myGAP).

“Kami ngarapka mayuh agi pekebun nambahka asil betanam betupi sida nengah AgriCOP enggau ulih nyapai RM4,000 sebulan ungkup diri sebilik.

“Ambika banding, baka ba kandang menua Mambong, Opis Betanam Betupi diatu fokus nanam kopi ba endur nya,” terang Uggah.

Jaku Uggah tu dibacha Adun Mambong Datuk Dr Jerip Susil ba pengawa bejadika AgriCOP di Dewan Serbaguna Kampung Taba Sait, seharitu.

Uggah ti mega Menteri Betanam Betupi Moden, Tanah Adat enggau Pemansang Kandang Menua madah, opis menteri iya udah mantaika pengawa betanam betupi moden baka gertigasyen bestruktur, hidroponik, akuaponik enggau Internet of Things (loT) lebuh nguna tanah enggau pengereja ti mimit aja kelimpah mansutka mayuh asil.

“Pekebun ba Mambong enda tau enda ngerebut peluang tu ngambi ngemansangka industri betanam betupi laban sayur enggau buah agi enda chukup sereta apin ulih tetangkupka peminta ba makit menua.

“Naka taun 2019, Sarawak semina nyapai 41 peratus ngidupka diri enggau chara nanam sayur enggau buah.

“Nya kebuah, aku minta bala pekebun nelebaka diri enggau chara baru lebuh nyual asil nya baka bejual nengah online baka ngena Timogah,” ku iya nerang silik.

Berebak enggau nya, Uggah madah Heineken Laluan nya pemungkal Timogah ti madahka piak Timogah mujur mansutka asil lebih RM100,000 sehari enggau urung lebih 1,500 udar diterima sebulan nyengkaum lebih ari 12,000 barang dijual.

“Ari untung pupu rata, ninting taun Timogah mujur mansutka asil lebih RM100,000 enggau serikat tu minta bala penguna bebayar nengah online,” ku iya nerang silik.

“Pengawa bebayar chara online tu muntang enggau ngelimat jam bala penguna,” ku Uggah.