KUCHING: Kaunsil Pengatur Pengawa SJK Chung Hua Siburan udah ngatur penemuai basa ngagai Kepala Menteri Datuk Patinggi Abang Johari Tun Openg betuaika Chairman iya, Phang Nam Fatt di Wisma Bapa Malaysia, ditu kemari.

Tuju pejalai nemuai meri basa nya laban deka minta geran tambah ari Perintah Sarawak dikena nyeleti SJK Chung Hua, Siburan.

SJK Chung Hua Siburan penyauh 17 batu ari Kuching enggau beumur lebih 50 taun nya begunaka belanja tambah dikena nampung ungkus nyeleti penyampau RM 2.26 juta.

Sebedau tu, sida bulih belanja ari pemeri mensia mayuh enggau Perintah Sarawak penyampau RM500,000.

Pengawa nyeleti SJK Chung Hua Siburan tu mungkur sekeda perengkaguna Kompleks Lumba baka padang main bol, trek sereta palan paking kerita.

Sama datai Menteri Muda Perengka Pengangkut Sarawak, Datuk Dr Jerip Susil enggau Sapit Chairman Kaunsil Pengatur Pengawa SJK Chung Hua Siburan, Chung Chon Shin.