KUCHING: Orang luar ti enda nemu bebasaka gaya pengidup rayat Sarawak ditagang tama kitu, pia ku Kepala Menteri Datuk Patinggi Abang Johari Tun Openg.

Abang Johari nyaut penerang Kaban Parlimen Pasir Putih Nik Muhammad Zawawi Salleh bekaul Bup Kudus di Aum Parlimen apin lama nyemetak madah, semua bansa ba Sarawak nadai ditagang ngereja pengawa nitihka jalai pengarap sida.

“Aku nadai kala nyekat sebarang pengawa bekaul enggau jalai pengarap di Sarawak laban semua nya endang meri pemaik.

“Nya alai, piak ti enda nemu enggau meretika pengelantang daya idup ba Sarawak enda dikelalu ngagai menua tu,” ku iya.

Abang Johari mansutka jaku nya ba Pengawa Nyuaka Geran Buding Komuniti DBNA ba Indu Opis DBNA, ditu ensanus.

Nambahka nya ku iya, ekonomi Sarawak nambah empat kali lipat pengudah lima peratus SST ba produk petroleum ti digali ba menua tu udah dibayar.

“Kami nerima RM500 juta asil ari lima peratus royalti minyak enggau gis dibanding SST iya nya RM3 bilion setaun.

“Kami ulih ngena belanja ari asil tu ungkup pemansang rayat di menua tu,” ku iya nerang.
Nya alai ku Abang Johari, Perintah Sarawak deka numbuhka lima buah sekula entarabansa khas ungkup nembiak menua ulu.

“Kami deka matih sida ba bidang siber enggau ekonomi digital,” terang iya