KUCHING: Menteri Dagang Temuai, Seni, Main Asal, Nembiak enggau Lumba, Datuk Abdul Karim Rahman Hamzah melabaka lebih mayuh temuai datai ari luar nyadika Sarawak rumah kedua sida nengah Program Malaysia Rumah Keduaku (MM2H).

Karim madah, ba program tu deka ngemanahka agi atur ke baru ungkup Rumah Kedua Sarawak, Malaysia (S-MM2H) ti dikenuku 1 September lalu.

“S-MM2H tu program dibaruh Opis Menteri Dagang Temuai, Seni, Main Asal, Nembiak enggau Lumba dikena matak mayuh agi temuai datai ke Sarawak jemah.

“Program tu udah diatur dalam timpoh 13 taun ke udah bepun ari taun 2007 ngagai 2019.

“Dalam timpoh nya, menteri nerima penyampau 1,240 penyereta ba program tu, taun 2019 penyampau 226 peminta ke mujur ti dibanding enggau 2018 semina 103 peminta ke mujur, “ ku iya.

Datuk Abdul Karim Rahman Hamzah

Tandu iya, nyangka lebih mayuh agi penemuai ti deka nyadika Sarawak Rumah kedua sida laban penyampau peminta MM2H dijangka makin niki bepelasarka trend sejarah statistik ke lama.

Berindik enggau nya, menteri iya udah bulih pemendar ari Kabinet Nengeri kena 18 Jun lalu ungkup kena ngaga atur S-MM2H.

Bisi 12 iti syarat enggau atur baru ti udah diseleti iya nya program tu dilalu ngagai penemuai ari selampur menua ti bisi bekaul enggau diplomatik Malaysia kelimpah seriris enggau dasar Perintah Besai ti bisi kaul enggau diplomatik luar.

“Syarat kedua, penemuai baru ti umur 40 ngagai 50 taun tau minta ari sukut pelabur hartanah ungkup kena endur diau ti penyampau urung RM600,000 aja.

“Syarat ketiga enggau empat, bala penemuai patut nyeretaka pom ti ngaul ulah diri ari menua asal ungkup kena bala peminta baru bagi pengelikun Sarawak enggau seriris enggau dasar Perintah Besai.

“Pas S-MM2H ulih dikinsil sebarang maya ti sema penyereta bisi bekaul enggau kes jenayah.

“Ba syarat kelima, ti ngaul bon pengelikun nya ungkup deposit jamin ti ulih dipulaika baru, ti ngelanggar enggau atur Imigresen tauka kebukai ti bekaul enggau penyereta S-MM2H nya ulih diguna ungkup kos dipotasyen enti utai perlu,” ku penerang nya.

Kelimpah nya, syarat lain iya nya ungkup pemaik ekonomi Sarawak deposit tetap ditiki baru ari RM100,000 ngagai RM150,000 sampai RM300,000.

Penyampau minimum meli rumah mega ditikika ari RM300,000 ngagai RM600,000 ungkup Pelilih Kuching enggau ari RM300,000 ngagai RM500,000 ungkup pelilih lain di Sarawak.

Karim mega madah, piak sida deka nubuhka Panel Sehenti ti ngaul ari selampur ejensi perintah ungkup ngemendarka aplikasyen S-MM2H kena ngemuntangka proses peminta enggau lengkas.

Nankan nya, ejen ke rijista enggau Motac Sarawak dikemendar ngenataika pom peminta ngagai piak peminta.

“Utai tu ukai semina ulih mantu bala peminta ti napi pemar ngiga penaja tang ulih kena mantu ejensi penemuai di Sarawak ungkup nyadi ejen S-MM2H.

“Apai Indai ke bisi anak umur 21 taun enggau bedau kawin dikemendar ulih enggau sida peminta sereta dipinta meli insuran berubat ungkup diri sida empu,” ku iya.

Karim meri penerang pengudah bulih pemendar ari selampur ejensi perintah pengudah ngatur berapa kali mesyuarat penyelaras baka Opis Ketuai Menteri (Unit Pentadbiran enggau Pengelikun enggau Penguatkuasaan Nengeri).

Kelimpah nya, ba Opis Luyar Sarawak (PPS), Opis Imigresen Sarawak (JIS), Polis Diraja Malaysia (PDRM), Opis Pengerai Sarawak (JKS) enggau Motac ungkup ngemenuhka syarat enggau atur ti dikemendar awakka pengawa tu bejalai enggau mujur.