KUCHING: Pelin Integrasi Nembiak Ungkup Penyerakup (Rimup) deka dipejalai baru ba sistem sekula vernakular di Sarawak ba taun baru.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit madahka Rimup kala dipejalai maya pegai perintah ti dulu sebedau diberentika lebuh perintah betukar ngagai Perintah Pakatan Harapan (PH).

“Ba baruh opis menteri aku iya nya Kaunsil Pemansang Rama kami kala bejalaika Rimup, udah nya PH megai perintah lalu diketu laban maya nya kami enda ulih tama ke sekula.

“Diatu kitai deka bejalaika baru ungkup Nengeri Sarawak lalu agih belanja program tu diberi Perintah Sarawak ba baruh opis menteri aku,” ku iya.

Iya bejaku munyi nya ba Program Timbal Rayat Bekaul Manuskrip Perambu Atur Penyerakup Bansa (PTPN) 2021-2025 Negeri Sarawak ba Dewan Yayasan Sarawak ditu, kemari.

Kenu ku iya, program Rimup tu manah ngagai bala nembiak ngambika ulih bebasa sereta sayauka pupu bansa bukai.
“Suba maya aku nyadi kepala pengajar di sekula, aku meda program tu amat manah.

“Intervensyen tumu baka Rimup diguna ngambika nembiak ulih bekaul enggau mayuh pupu bansa enda ngira ba pekara lumba, main asal enggau ke bukai.

“Tu entara pekara ti diperambu kitai ungkup Nengeri Sarawak,” ku iya.

Iya ngelansa sentang pesul Ketuai Angkatan Bersatu Anak Muda (Armada) Parti Pribumi Bersatu Malaysia (Bersatu), Wan Ahmad Fayhsal ti deka sekula vernakular dikinsil berenggat.

Tandu Fatimah, ari ti nginsilka sekula vernakular di Sarawak endang lebih muntang endur perintah ngatur siti program ti ulih mutarka isu ti ayan bekaul enggau sekula nya.

“Kitai ulih ngaga bala nembiak bekaul entara siku enggau ke bukai, nya kebuah tiap program ti digaga mesti ngaul semua pupu bansa awakka semengat segulai sejalai ulih diseridi.

“Pekara nginsilka sekula vernakular tu patut dipeda ari sejarah iya ditumbuh enggau dini penuduk sekula nya diatu, nya kebuah kitai mesti meda isu tu bebendar.

“Mayuh orang melaba sekula tu deka ngasuh ulah polarisasyen ayan, tang enti dipeda amai polarisasyen datai ketegal kebuah bukai,” ku iya.

Iya nyemetak madah, ari ti meda pengurang sistem nya endang lebih manah enti sida ngiga jalai mutarka.

“Enti pengurang sekula nya ari sukut enggai bekaul enggau bansa bukai lalu semina deka begulai enggau bansa sida aja.

“Nyadi, kita numbuhka program ti ulih ngasuh sida bekaul enggau bansa bukai,” ku iya.

Nangkan nya ba pekara bukai, Menteri Penyerakup Menua Datuk Halimah Sadique madah, perintah enda deka ngubah sistem pelajar menua nyengkaum nginsilka sekula vernakular laban deka negapka penyerakup dalam semua raban bansa.