MIRI: Konvensyen Khas Parti Pesaka Bumiputera Bersatu (PBB) Zon Utara udah ngemendarka 11 mosyen ti mandangka sukung ngagai Kepala Menteri Datuk Patinggi Abang Johari Tun Openg.

Mandal Chairman PBB ti mega Menteri Utiliti Datuk Sri Stephen Rundi Utom madah, mosyen nya udah disetuju 961 pengari ari 17 pampang PBB Zon Utara ke bisi datai lalu deka disua ngagai Abang Johari.

“Mosyen tu ti ngaul nyukung penuh ngagai Kepala Menteri nyadi Presiden PBB enggau Chairman Gempung Parti Sarawak (GPS) terus ngiring Sarawak nyadi Kepala Menteri ti deka awakka terus nyapai pemujur ba Pengawa Bepilih Nengeri ke-12 (PRN-12).

“Sukung penuh polisi, agenda enggau inisiatif Kepala Menteri ari semua sukut kelebih agi ekonomi digital.

“Kami mega nyukung polisi Kepala Menteri ngenegapka rayat ba pengawa dagang nengah program inovatif nyengkaum industri minyak enggau gis.

“Beserakup begulai enggau Kepala Menteri ngenanka semua hak Sarawak ti ngaul Sempekat Malaysia 1963 (MA63).

“Nambahka nya, kami mega nyukung pengawa ngubah Kanun Tanah Sarawak ti ngenanka hak Bansa Asal baka Tanah Adat Bansa Asal (NCR) enggau ngenukuka undang-undang ngagai Domain Kawasan Peribumi,” ku iya.

Rundi mega madah, pengawa perintah ti deka ngerumban pemansang menua pesisir kelebih agi infrastruktur enggau perengkaguna mensia mayuh endang patut disukung.

Tu nyengkaum pengawa numbuhka ejensi pemansang menua baka Ejensi Pemansang Hulu Rejang (URDA), Ejensi Pemansang Wilayah Utara (NRDA) engga Ejensi Pemansang Tanah Tinggi (HDA) ti dikenataika Kepala Menteri.

“Nentuka Perintah Besai meri agih belanja bela penyampau ngagai pemansang Pelajar entara nengeri enggau menua pesisir baka nyeleti sekula repuk.

“Kelimpah ya, ngenanka kaul bebaik entara pupu raban bansa, jalai pengarap enggau main asal nengah polisi perintah enggau pengawa perintah baka Unifor.

“Sukung mega diberi ngagai Kepala Menteri ba pengawa ngemayuhka pemansut belanja menua nengah ‘revenue re-engineering’ enggau belanja inovatif dikena ngemansangka Sarawak.

“Kami mega nyukung pengawa perintah deka nyaga raban B40 enggau chara nyendiaka Rumah Ulih Dibeli enggau nyendiaka pengawa puang enggau latih,”ku iya.

Ba simpul jaku, Rundi meri tabi basa ke penyiru perintah nengeri ti udah meri bantu baka Bantu Khas Sarawakku Sayang (BKSS) sekumbang Atur Tagang Pejalai (PKP) ketegal pengerekai igi penyakit Covid-19.

Sama datai Chairman Mendam PBB ti mega Speaker Dun Datuk Amar Mohd Asfia Awang Nassar, Sapit Kepala Menteri ti mega Chairman Komiti Konvensyen Khas Pbb Zon Utara Datuk Amar Awang Tengah Ali Hassan enggau Naib Chairman PBB ti mega Menteri Kereja Raya Datuk Seri Fadillah Yusof.