SARIKEI : Perintah Sarawak nengah Unit Pekara Pengarap Bansa Bukai (UNIFOR) ngungkupka agih RM80,000 dikena ngemanah Gerija Methodist Iban, Sare ditu.

Pengawa nyuaka pemeri nya dikemujurka Menteri Muda Perambu Mengeri, Pengatur Tanah enggau Rampa Menua, Datu Len Talif Salleh, seharitu.

Adun Kuala Rajang nya madah agih nya mandangka perintah ngemeratka rayat pupu bansa enggau pengarap di nengeri tu.

“Arapka nengah pengawa tu, rayat ditu ulih bejalaika tanggungpengawa besembiang enggau likun sereta lantang,” ku iya.

Kenu ku iya, perintah ngembuan perambu ngemansangka menua Sare awakka pengidup rayat ditu angkat agi jemah.

“Tu nyengkaum perambu ngaga jalai tujuh kilometer (km) ari Selalang /Kerubong nuju ke Sare enggau rembus ke Sarikei.

“Jalai tu deka ngemuntangka pejalai rayat ari Kabong, Sessang, Nyabor, Gerigat nurun ke Sarikei enggau bejalai ke Sibu kelimpah nengah Pan Borneo,” ku iya.

Len Talif madah, jalai baru nya ulih ngemuntangka pejalai peranak 13 buah rumah panjai kelimpah nyendiaka perengkaguna pemun baka ai enggau karan.

“Aku begunaka kerejasama enggau sukung rayat ditu dikena ngemujurka perambu tu,” ku iya.

Dulu ari nya, Len Talif nyuaka chek ba Gerija St Alban, Taman Susur Jambu, Sarikei.