MIRI: Kepala Menteri Datuk Patinggi Abang Johari Tun Openg nangkan bala kaban Parti Pesaka Bumiputera Bersatu (PBB) terus taluk ngagai parti taja bisi betapi enggau penanggul tauka asa.

Ku iya, kaban parti ke asa enda patut ngaga pemutus pansut tang patut terus gawa nyukung parti.

“Lebuh bejaku pasal penaluk ngagai parti, endang bisi dalam pengidup kitai mayuh pengurang lalu kekadang bisi maya di atas lalu di baruh.

“Tang bisi sekeda orang ngasai diri asa terus engkechit ari parti.

“Enti nitih kaban parti patut nganti dulu sebedau angkat,” ku iya maya ngenataika jaku lalu nyerumba Konvensyen Khas PBB Zon Utara ditu, kemari.

Abang Johari ke mega Presiden PBB madah iya empu kala asa tang enda kala ngalahka diri laban deka gawa nyukung parti.

Tambah mega, ku iya lebuh PBB betapi enggau penanggul besai maya 1987, iya terus taluk dalam parti begulai enggau ex-Kepala Menteri niang Pehin Sri Adenan Satem enggau bala ketuai PBB ke bisi diatu.

“Tu enda, mimit asa lalu deka pansut parti. Tu kebendar bisi juluk kediri ukai ungkup parti, lebuh maya enda dichiri nyadi Temenggong enggau Pemancha terus ringat,” ku iya.

Iya ke mega Chairman Gempung Parti Sarawak (GPS) madah kaban PBB enggau GPS patut beteladanka pekara ke nyadi ba Semenanjung nyadi lalau.

“Maya penanggul mit dikemesai, sida ngaga pemutus pansut ari parti lalu numbuhka parti bukai.

“Maya GPS nyukung Perikatan Nasional (PN), ukai kitai bisi penanggul tang orang ke ngemaduka diri ari pangku pengawa ke bisi penanggul.

“Kitai mantu menua lepas ari keruga Covid-19,” ku iya.

Sama datai Chairman Mendam PBB ke mega Speaker Kunsil Nengeri (Dun) Datuk Amar Mohd Asfia Awang Nassar, Sapit Kepala Menteri ke mega Sapit Presiden PBB ke mega nyadi Chairman Komiti Konvensyen Khas PBB Zon Utara Datuk Amar Awang Tengah Ali Hasan, Sapit Kepala Menteri ke mega Sapit Presiden PBB Datuk Amar Douglas Uggah Embas, Sekretari Besai PBB ke mega Menteri Dagang Dalam Menua enggau Pekara Penguna Datuk Alexander Nanta Linggi, Mandal Presiden Kanan PBB ke mega Menteri Kereja Raya Datuk Seri Fadillah Yusof enggau Mandal Presiden PBB ke mega Menteri Utiliti Datuk Seri Stephen Rundi Utom.