KUCHING: Menteri Dagang Temuai, Seni enggau Main Asal Datuk Seri Hajah Nancy Shukri madah lebih RM5 juta asil chukai Dagang Temuai diterima Sarawak ba taun 2019.

Nancy munyi nya lebuh ditanya bala pemberita ba pengawa Lan Berambeh, seharitu.

“Asil chukai nya penyampau 50 peratus ari Chukai Dagang Temuai di nengeri tu. Asil chukai nya dibayar terus ngagai Perintah Nengeri Sarawak lalu asil nya manggai lebih ari RM5 juta,” ku iya.

Tandu iya, asil chukai tu ukai semina diterima nengeri Sarawak aja, tang nengeri Sabah mega nerima asil chukai ti lebih mayuh ari Sarawak penyampau RM20 juta ba chukai Dagang Temuai.

“Tu nunjukka nengeri Sabah ngembuan mayuh produk enggau perengka kena matak bala temuai datai ngagai nengeri nya,” ku tandu iya.

Nankan nya, Nancy mega meri penerang ba pengawa ngeranchakka sektor ekonomi dagang temuai di nengeri tu ti deka bekena ka agih belanja penyampau RM100 juta.

“Lebuh pengawa bejalai aku ngagai Sarawak, aku nerima mayuh peminta ari Perintah Sarawak enggau pengari rayat ditu.

“Pengudah berandau pasal Langgur Pemansang Malaysia Lumpar Ke-12 (RMK-12), kami deka meda nama patut diberi dulu ungkup pejalaika pemansang ba timpoh lima taun,” ku Nancy.

Lebuh dirandau bala pemberita, Nancy mega madah ukai reti Sarawak minta diberi agih belanja, tang Sarawak sigi bisi ungkup enggau agih belanja nya.

“Kitai patut ngenanka penegap ekonomi enggau politik kitai laban nya ulih meri pemaik ngagai semua piak ti deka minta agih belanja,” ku iya.