MIRI: Chalun enggau Penyukung Gempung Parti Sarawak (GPS) patut mantah enti tetemu orang Semenanjung nyadi ejen ba Pengawa Bepilih Besai Nengeri (PRN), ejen palan undi enggau ejen ngira undi di sitak diri empu ba pengawa Bepilih Besai Nengeri ke-12 ti deka datai.

Speaker Kunsil Nengeri (Dun) Datuk Amar Mohd Asfia Awang Nassar madah, bantah nya ulih digaga nitihka Seksyen 65,66 enggau 67 Akta Imigresen.

“Parti ari Semenanjung sigi nguna orang ari Semenanjung nyadi ejen ba pengawa Bepilih Besai Nengeri, ejen palan undi enggau ejen ngira undi tu patut dibantah kitai laban sida masuk ke Sarawak nadai permit gawa,” ku iya.

Asfia madah munyi nya lebuh ngenataika licha bekaul “Ke Arah Kemenangan” ba aum Konvensyen Khas Parti Pesaka Bumiputera Bersatu (PBB) Zon Utara di hotel, kemari.

Berindik enggau nya, Asfia mega mangku pengawa nyadi Chairman Mendam PBB ngelalau bala chalun PBB awakka nyiri siku peguam ti bepenemu enggau landik bekaul Akta Kesalahan Pilihan Raya 1954, Akta Imigresen enggau kebukai.

“Tu kena kitai nyeliahka diri ari penyilap enggau penanggul ti ulih meri penusah ngagai chalun kelebih agi ti bekaul petisyen pengawa bepilih,” ku iya.

Nya alai, petisyen pengawa Bepilih Besai Nengeri tu patut diseliahka bala chalon enggau enda ngaga sebarang pengawa ti salah.

“Strategi penyakal enti kalah ba pengawa bepilih, sida sigi menang dalam mahkamah lalu ngaga petisyen pengawa bepilih.

“Hakim enda sama, di Semenanjung sida enda kiruhka petisyen laban tegas, tang di Sarawak enggau Sabah patut bejimat laban sida liberal enggau petisyen pengawa bepilih tu.

“Nya alai, bala chalon patut bejimat enti ditemu nama chalon ke dianjung salah, bala penyakal sigi nguna peluang tu ngaga petisyen kena nyaman chalon nyadi defenden keterubah enggau Ejensi Bepilih Besai (SPR) nyadi defenden kedua laban nerima nama chalon ke salah,” ku iya.

Asfia ngelalau chalon PBB awakka lebih semak enggau rayat awakka ulih menang ba pengawa bepilih.

Tandu iya baru, chalon patut ngembuan Indeks Prestasi Utama (KPI) enggau Indeks Prestasi Tidak Dapat Dilihat (KIPI) ti nunjukka sida pegari rayat.

“Taja bisi projek besai, tang kaul enggau rayat nadai, tu enda meri jamin deka menang ba pengawa bepilih.

“Kitai mesti malas, ngelaban enggau matahka jaku ajum ti ngerembaika polisi Kepala Menteri Datuk Patinggi Abang Johari Tun Openg enggau terangka bajet ke udah digaga perintah GPS nya baru ulih menang.

“Kitai ukai semina bepelasarka nengah media rama aja,” ku iya.

Sama datai Menteri Dagang Dalam Menua enggau Pekara Pengguna mangku pengawa Sekreatari Besai PBB Datuk Alxander Nanta Linggi, Menteri Kereja Raya nyadi Mandal Chairman Kanan PBB Datuk Seri Fadillah Yusof enggau Menteri Bekal Ai enggau Elekterik Menua Pesisir Mandal PBB Datuk Seri Stephen Rundi Utom.