MIRI: “Kepala Menteri (KM) enda kediri, kitai deka begulai enggau Kepala Menteri dalam sebarang aja utai ke nyadi,” ku Sapit Presiden Parti Pesaka Bumiputera Bersatu (PBB) Datuk Amar Awang Tengah Ali Hasan beserimbai enggau Konvensyen Khas PBB Zon Utara ditu kemari.

Kenu ku Sapit Kepala Menteri ke mega Chairman Komiti Konvensyen Khas PBB Sarawak Zon Utara nya, PBB deka terus nentuka GPS menang ba Pengawa Bepilih Besai Nengeri Ke-12 (PRN-12) deka datai.

“Nengah semangat dalam siti tim, genap pemujur nya kebendar pemujur begulai.

“Taja betapi enggau ba luan api, dibelakang duri, kitai deka terus begulai beperang.

“Kitai bisi ‘pendekar-pendekar’ ke ngembuan semangat ke tinggi enggau liat ati nyapai pemujur,” ku iya.

Awang Tengah mega madah, rayat patut meri sukung penuh ngagai ketuai Sarawak enggau perintah dikena nentyka pemansang terus dikemujur.

“Parti-parti bukai, bisi ayan ketegal penyarut enggau ketuai ke ngiring parti lama sida lalu bisi mega ayan ketegal pengawa bepilih besai.

”Sida ari Semenanjung Malaysia sigi enda negika hak enggau pengelantang kitai, lebih agi bekaul enggau pemansang nengeri tu,” ku iya.

Nya alai, iya nangkan rayat pasal semaya puang ke kala dibantai perintah Pakatan Harapan (PH).

“Maya Pengawa Bepilih Besai (PRU) ke udah, sida besemaya deka minta 20 peratus royalti minyak enggau 50 peratus asil chukai Sarawak lalu diberi baru ngagai kitai.

“Tang maya perintah PH, semaya tu nadai dikeamat nyentuk mayuh ketuai dalam parti nyengkaum pengari rayat pansut ari parti sida.

“Nya alai, kitai rayat Sarawak patut meretika pemesai reti pengawa ke digaga parti kitai tu PBB enggau parti bukai dalam GPS,” ku iya.