KUCHING: Tuai rumah ga genap rumah panjai dipinta nyidi silik penerang pasal nembiak redak sida ngambika enda tinggal nerima bantu ari perintah.

Sekretari Politik Kepala Menteri Tan Kai madahka tuai rumah enda patut ngemeluka nembiak redak pegai sida taja udah bisi nerima bantu.

“Taja nembiak redak kita udah nerima bantu tang pansik agi penerang bukai ngambika sida enda tinggal nerima bantu baka Bantuan Sara Hidup (BSH), Kenyalang Gold Card (KGC), Bantuan Khas Sarawakku Sayang (BKSS) enggau ke bukai.

“Kelimpah ari nya, tuai rumah patut berundingka chara bukai mantu nembiak redak sida awakka bala rayat idup likun,” ku iya.

Iya bejaku munyi nya ba Program Amal Komuniti Bumiputera Kota Sentosa di Kampung Stampin Baru ditu, kemari.
Tan Kai mega meri terima kasih ngagai penaja barang bantu Aaron Tay ti udah meri bantu baka berau, telu, kerusi roda, tungkat enggau barang bukai.

Ba program kemari, bisi 44 iku orang ti begunaka bantu baka orang nyelai pendiau (OKU), orang tuai enggau indai tunggal ari Kampung Stampin Baru, Kampung Stampin, Kampung Stutong, Kampung Temedak, Kampung Sungai Tapang enggau Kampung Lubuk Buan nerima bantu.

Dulu ari nya, Penghulu Jakup Buan madahka bantu tu dikearap ulih ngelempungka tating bala sida ti nerima.

“Taja enda mayuh aku ngarapka bantu tu ulih ngelempungka tating belanja kita.

“Aku mega ngarapka kita nguna servis tuai rumah minta bantu ngagai perintah.

“Anang enda bekerejasama enggau tuai rumah laban kami naka ulih deka mantu kita ngulihka pengelantang,” ku iya.

Sama bisi datai Aaron Tay, Pengulu Gunting, Tuai Rumah Kampung Stampin Baru Christopher Chaong, Tuai Rumah Kampung Stampin Dennis Sungkok enggau ke bukai.