BATU LINTANG: Anang ngelaban perintah enti sema enda dichiri nyadi tuai rumah, pia ku Menteri Muda Pengintu Pengelantang Komuniti Datuk Francis Harden Hollis.

Ku iya, peranak rumah panjai pechah ketegal berebut deka nyadi tuai rumah.

“Perintah enggai nyiri tuai rumah ti puntan nitihka syarat ti udah dirintai.

“Kita mesti ingat, isu nyiri baka tu ngujungka sida berani ngelaban perintah,” ku Harden.

Harden mansutka jaku nya ba Program Information On Wheel (IOW) diatur Opis Pemadah Sri Aman ba Rumah Sherit Tambon, Undop, apin lama ke udah.

Terang iya, ketuai komuniti enggau ketuai raban bansa (KMKK) ti udah dichiri mesti meri kerejasama setipak enggau juluk perintah ke diatu.

“KMKK bisi kuasa penuh ngagai komuniti sida lalu sida mega mesti nemu pangku pengawa nyaup perintah bejalaika buah pemansang.

“Perintah nyiri KMKK ari Opis Residen enggau Pelilih ngambika sida meri kerejasama setipak enggau juluk perintah diatu.

“Ukai ngasuh sida mantaika penemu ngelaban perintah ti udah nyiri sida ngelamatu.

“Kitai patut beterima kasih enggau inisiatif dipejalaika perintah lebuh ngemansangka kandang menua lalu anang ngembuan ulah enda ingatka budi perintah,” ku Adun Simanggang nya.