KUCHING: Akademi Gerempung Dayak Iban Sarawak (Asadia) udah belabuh ngepunka kelas belajar ngaga Periuk Tanah tauka dikumbai Periuk Tupai.

Ketuai Asadia, Mabong Unggang madah kelas nya diatur nengah kerejasama enggau Kaunsil Kraf Sarawak lalu diajar siku pematih ari Krafjari Malaysia iya nya Nabilah Abdullah.

“Terima kasih ngagai Kaunsil Kraf Sarawak laban udah meri peluang ngagai raban Asadia belajar ngaga Periuk Tanah.

“Pia mega tabi puji ngagai Krafjari Malaysia ti udah nyendiaka palan sereta pengajar ti landik ngajar ngaga Periuk Tanah.

“Kitai (Iban) patut belajar ngaga Periuk Tanah tu sereta patut ngibun Periuk Tanah di bilik diri laban periuk nya siti ari keresa pesaka asal bansa kitai jeman kelia menya,” ku iya madah ngagai Suara Sarawak.

Periuk Tanah

Nitih pansik ti dikeluarka Sarawak Muzium Journal, siti Periuk Tanah kala ditemu dalam Gua Niah beumur lebih 40, 000 taun sebaka sekali enggau Periuk Tanah ti dikembuan bansa Iban.

Nya alai, aku arapka raban Asadia ti udah belajar ngaga Periuk Tanah ulih ngerembaika penemu nya orang bukai ngambika periuk pesaka kitai nya meruan dikeingat bansa Iban, ku Mabong.

Kelimpah ari Periuk Tanah, pesaka bukai mega patut ditan sereta dikemeran ngambika tanda bansa kitai enda lenyau.

Berebak enggau nya, pemesai ari Kaunsil Kraf Sarawak Tandang Matu muji pengeransing raban Asadia ti berani ngepunka pengawa belajar ngaga Periuk Tanah.

“Penemu nya beguna amat laban Periuk Tupai tu endang sigi pesaka bansa Iban. Kaunsil Kraf Sarawak naka ulih nulung ngangkatka pengelandik ngaga keresa asal bansa kitai (Iban) baka Periuk Tanah, Berayam, Betenun enggau penemu bukai.

KERESA PESAKA…Mabong mandangka pendiau Periuk Tanah ti mesti dikembuan genap bansa Iban.

“Pengawa tu manah laban asil ari pengelandik ke udah mujur ditempa nya ulih dijual dikena nambahka penatai pemisi,” ku iya.

Penyampau penyereta masuk kelas ngaga Periuk Tanah tu diatu, ku Tandang agi ditatak iya nya enda ulih mai mayuh orang laban atur perintah ti agi bejalaika Atur Pengawa Standard (SOP) bekau ari pengerekai penyakit Covid-19 lalu nagang orang begelumu kelalu mayuh.

Taja pia, pengajar kelas tu Nabilah madah diri chukup gaga ati laban bisi rebak baru baka raban Asadia ti siruka keresa pesaka bansa baka Periuk Tanah.

“Kitai sigi patut belajar ke penemu ngaga perengka asal kitai ngambika iya meruan dipeda sereta dikelala nembiak rebak dudi.

“Penemu ke dikunsi aku dikearapka ulih dikerembai awakka mayuh agi rebak baru nemu ngaga Periuk Tanah tu,” ku iya.

PENGAWA MANAH…(duduk ari kiba) Tandang, Nabilah enggau Mabong begambar kenang enggau sekeda penyereta ti bisi nyereta kelas ngaga Periuk Tanah, apin lama ke udah.

Ungkup penemu naka tu semina siku aja orang ti udah ditemu landik ngaga Periuk Tanah di Sarawak iya nya Tuai Rumah Andah, ari Nanga Sumpa Lubok Antu.

Leka jaku Periuk Tanah tu mega bisi kena pansa leka biau Iban ti nyebut munyi tu ; Aku tu endang niti endang nali, Baka ijuk tampung penduk, Baka rutan tampung danan, Baka ira tampung lemba, Baka wi tampung tali, Pechah Periuk Tanah, Ganti Periuk Tani, Padam bulan, Ganti Matahari, Parai orang ke tuai, Ganti tubuh kami,
Pambu orang ke dulu, Ganti kami ke dudi.