KUCHING: Francisca Luhong James ngemegah nama Sarawak pengudah menggi gelar Miss Universe Malaysia 2020 kena Hari Enam tu tadi.

Dara bajik penakan Iban, Kenyah enggau Kayan tu deka ngarika Malaysia ba Pekit Miss Universe 2020 ila.

Nitihka penerang ditibak ari Astro Awani, malam Hari Enam tu tadi, Francisca udah ngena gaun chura kalas ditengkebang dua iku penengkebang pisin tebilang iya nya Rizman Ruzaini.

Pia mega, Francisca, 25 taun mujur ngalahka 17 penyereta bukai ngujungka iya dipadu ngarika Malaysia ba Pekit Miss Universe 2020.

Ungkup penerang semua, Pekit Miss Universe Malaysia 2020 tu keterubah iya diatur nengah online ari Damansara, Petaling Jaya.

ANAK SARAWAK… Francisca ngemegah nama Sarawak pengudah dipilih ngarika Malaysia ngagai Pekit Miss Universe 2020. -Gambar Instagram Francisca Luhong.

Ba lansa sama, Francisca mujur ngalahka tiga penyereta ba renggat kepenudi iya nya Neha Verma,22, Serene Chai, 26, enggau Charissa Chong, 26.

Nambahka nya, penuduk lumur dua diempu Charissa Chong, lalu lumur tiga diempu Serene Chai sereta keempat Neha Verma.

Ungkup penemu, Francisca diatu gawa nyadi Pemesai Kaul Mensia Mayuh sereta gawa nyambil nyadi model.

Taun nyin kemari (2019), gelar champion pekit tu dipenggi Shweta Sekhon pengudah iya mantaika diri ngena pekayan Kebangsaan.

BELA BAJIK…Francisca (dua kiba) begulai enggau bala pemenang ke bukai.-Gambar Instagram Francisca Luhong