Parti Pesaka Bumiputera Bersatu (PBB) udah ngatur sebengkah aum besai keterubah sida ensana enggau berambaika jaku ‘Hak Sarawak Diutamakan, Pembangunan Diperkasakan’.

Konvensyen tauka aum besai tu diatur khas ba sitak Utara Sarawak lalu tiga agi konvensyen deka diatur di Sibu, Betong enggau Kuching.

Berindik enggau penanggul pengerekai igi penyakit Covid-19 enggau Atur Pengawa Standard (SOP), Parti Pesaka Bumiputera Bersatu (PBB) nyadika tulang belakang Gempung Parti Sarawak (GPS) milih ngatur konvensyen ba empat palan ti dibandingka ngatur konvensyen lebih besai di Kuching baka selama.

Sapit Kepala Menteri ti mega Sapit Presiden Parti PBB Datuk Amar Awang Tengah Ali Hassan ngelimpangka awak diri nyaut tanya ari Suara Sarawak lalu bekunsika penemu pasal konvensyen ti diatur beserimbai enggau Pengawa Bepilih Besai Nengeri (PRN) ti deka datai.

Nama kebuah kovensyen tu diatur ba empat zon bepun ari Miri?

Datuk Amar Awang Tengah Ali Hasan

Sebedau tu, kitai merambu ngatur konvensyen tu di Kuching baka selama. Kitai deka ngempuruka semua kaban parti ari selampur Sarawak datai ngulu konvensyen khas tu di Kuching.

Nya alai, penanggul bekau ari Atur Tagang Pejalai Penyuman (PKPP) ti enda ulih diseliah sereta mesti nitihka Atur Pengawa Standard (SOP).

Nya mih kebuah nya kitai ngaga pemutus ngatur konvensyen tu nitihka zon. Bala ke dikangau datai deka ditatak nitihka kapasiti balai Hotel Meritz, Miri.

Semina 50 peratus ari kapasiti pemesai palan dijangka muat urung 800 ngagai 900 penyereta aja ulih masuk.

Sapa disadang ngulu konvensyen tu?

Datuk Amar Awang Tengah Ali Hasan

Konvensyen Zon Utara ti ngaul semua 17 pampang PBB.

Deligit ti bekaul ari Kaban Komiti PBB nyengkaum Sayap Besai Tuai, Komiti Raban Nembiak enggau Indu sereta semua pengari rayat

Kitai mega ngelaluka sekeda orang lama ti numbuhka parti PBB.

Kebuah kitai deka natak penyampau penyereta laban igi penyakit Covid-19. Nyangka maya bukai kitai nganggau sida ba konvensyen zon bukai dikena nitihka atur SOP.

Sekeda pemerati politik meragam Konvensyen Khas tu siti chara ti dikena nyikap diri napi PRN deka datai, nama komen Datuk Amar ba pekara tu?

Datuk Amar Awang Tengah Ali Hasan

Mensia mayuh nemu timpuh Kaban Kunsil Nengeri (Dun) deka abis ba taun baru. Bekaul enggau haribulan pengawa bepilih, nya tepulai ngagai YAB Kepala Menteri Datuk Patinggi Abang Johari Tun Openg ngaga pemutus.

Kami ba PBB ngatur konvensyen ukai semina maya semak pengawa bepilih, tang tu sigi atur pengawa ke endang suah diatur parti dikena kaban PBB enggau semua komuniti meretika polisi perintah.

Nama utai deka nyadi fokus kami ba konvensyen tu deka ngerapatka kaul enggau ngenegapka penyerakup diri kelebih agi kaban parti. PBB sebuah organisasyen ti besai ti ulih nyadika penyerakup lebih tegap.

Konvensyen siti pelasar alai bala ketuai ba renggat baruh ulih semak enggau orang ba renggat atas kelimpah ulih betukar penemu enggau buah runding ari dikena ngenegap penyerakup parti.

Nama rambai jaku konvensyen taun tu?

Kami milih rambai jaku ‘Hak Sarawak Diutamakan, Pembangunan Diperkasakan’ ba aum konvensyen serak tu.

Nama reti rambai jaku ke dipilih nya?

Kami milih rambau jaku tu laban deka meri kelai ari sukut misyen parti enggau misyen Gempung Parti Sarawak (GPS) ti deka ngenegapka hak Sarawak baka udah dikenukuka ba Sempekat Malaysia 1963 (MA63) enggau nyadika Sarawak menua ti maju ba taun 2030 ti deka datai.

Pengawa ngenegapka hak Sarawak bepun ari niang Tok Nan.

Berindik enggau nya, Abang Johari diatu neruska pengawa niang ti deka nagih hak kitai nengah MA63.

Abang Johari udah netapka visyen dikena ngemansangka Sarawak nyadi menua maju enggau nyungkak pemansut belanja menua ba taun 2030 ti deka datai. Nya alai, Abang Johari numbuhka Ekonomi Digital bekaul enggau siti strategi kena nyapai visyen nya.

Ba pengawa nyapai visyen nya, kitai patut ngangkatmanah jalai alun enggau semua perengkaguna pemun nyengkaum jalai nengah laut enggau nengah angin.

Nengah Ekonomi Digital, kitai ulih bejalaika pengawa dagang sampai ke menua luar (entarabansa) ti dibanding enggau pengawa dagang dalam menua enda besai.

Ambika chunto ari menua China, China kelia sebuah menua ti miskin ba taun 60-an enggau 70-an, ba taun 80-an menua nadai pemansang enda baka dipeda kitai diatu. Nya alai, sida bejalaika polisi strategik enggau fokus ngagai pemansang insfrastruktur ti ngujungka nyadi menua megai kuasa ekonomi besai di dunya.

Nyadi, Abang Johari ngembuan juluk ati deka ngemansangka Sarawak lalu fokus ngagai sektor strategik.

Nama program diperambu ungkup konvensyen tu?

Konvensyen tu semina diatur sehari aja. Deligit deka ditangkan enggau jaku lalau bekaul enggau gaga enggau anang (Do’s and Don’ts) ba pengawa bepilih.

Keretas kereja di bekaul enggau atur tanah di Sarawak nengah hak tanah adat enggau ngaul pejalai industri minyak enggau gis di Sarawak deka dibantai.

Kelimpah nya, bekaul enggau atur strategik ngaul Pemansang Koridor Wilayah (RECODA), tanggungpengawa Ejensi Pemansang Tanah Tinggi (HDA), Ejensi Pemansang Hulu Rejang (URDA), Ejensi Pemansang Wilayah Utara (NRDA) mega deka dibantai.

Nama pengelebih iring Abang Johari ari sukut nyadi ketuai PBB ti mega Presiden enggau mai Sarawak lebih ke mua?

Kepala Menteri kitai siku ketuai ti semampai semak enggau rayat sereta ulih begaul enggau sapa aja enda ngira orang tuai tauka orang biak, iya sama baka niang Tok Nan sebedau tu.

Gaya nyadi ketuai tu manah kena ngenyemakka diri enggau semua renggat ba komuniti. Kelimpah nya, Abang Johari mega siku ketuai ti semampai mendingka peminta rayat.

Nama selalu dikemeratka Abang Johari ba sukut ketuai parti?

Kesatu, Abang Johari semampai ngemeratka penyerakup enggau pangan diri enggai meda kitai pambar. Kaban parti patut bekerejasama nyadi siti tim ti ulih nyadi pengering parti.

Kedua, Abang Johari deka semua kaban parti patut terus bekerejasama enggau kaban parti komponen GPS ke bukai enggau kelebih agi enggau komuniti. Sida tu meh nyadika tulang belakang ti ulih nyukung Kepala Menteri ti nagih hak MA63.

Berindik ari nya, Abang Johari deka kaban parti mereti enggau ngerembaika polisi sereta program ti dipejalaika perintah.

Nama penanggul ditapi PBB ti bekaul enggau ubah Politik enggau bakani mutarka penanggul nya?

Kami mayuh napi penanggul baka penyadi Ming Court enggau baka diatu Perintah Besai ti berubah ari Barisan Nasional (BN) ngagai Pakatan Harapan (PH).

Politik berubah ti ngujungka PH tumbang enggau diatu kitai dipegai Perikatan Nasional (PN). Sekumbang politik berubah tu ti ngujungka parti kami lebih tegap agi enggau beserakup numbuhka Perintah Besai di baruh PN. Kami nyukung perintah PN tang kami enda begulai enggau parti politik di Semenanjung Malaysia.

Kati parti PBB agi betanding ba 45 peduduk ba PRN deka datai?

Kami bedau meri pemutus ba pekara tu. YAB Kepala Menteri kitai sigi deka ngerandauka pekara tu begulai enggau parti komponen ke bukai dalam GPS. Utai ti beguna iya nya kami dalam GPS ulih menang besai ba pengawa bepilih nengeri ti deka datai.

Berapa iti kriteria ungkup chalun ti deka betanding dikena ngetanka penuduk enggau bisi enda chalun ti narit diri?

Raban parti nyendiaka diri nerima pemutus ti digaga ketuai parti tu. Tu siti prinsip pemun dalam parti ngulihka raban parti nyadi tulang belakang Perintah Nengeri.

Nama kriteria digiga ba chalun baru?

Kami bisi chara kediri dalam parti PBB. Kadang bisi pengari kami ti deka narit diri. Tu ngemuntangka agi pengawa ngiga ganti chalun ke baru.

Kami dalam parti PBB, bisi ngembuan mayuh ketuai ti bisi kualiti, nyadi nya nadai meri penanggul ngiga chalun baru. Sapa aja ulih nyadi chalun, tang sida mesti nemu enggau prinsip pejalai parti. Sida mega patut ngembuan kerejasama ti tegap dalam tim.

Berapa mayuh sida ti ngelakuka diri minta pilih ba rintai ketuai PBB?

Tu sigi pekara suah nyadi maya semak pengawa bepilih. Kami semampai mansik ari semua sukut sebedau ngaga pemutus milih chalun.

Ba pengawa bepilih ti deka datai, nama lalau ari pemuntan ba pengawa bepilih besai sebedau tu?

Ba pengawa bepilih nengeri ke udah, iya nya taun 2016, semua chalun PBB menang.

Ba pengawa bepilih besai apin lama ke udah, PBB semina lenyau siti penuduk. Kami mansik kebuah alah ba pengawa bepilih enggau deka ngangkatmanah agi pengurang suba dikena napi pengawa bepilih ti deka datai.

Enti sema Dun dipadam pagila lusa, kati Datuk Amar andal GPS ulih menang besai?

Kami andal, enti pengawa bepilih diatur barang maya, kami deka menang nengah sukung ari rayat. GPS ngembuan rikod ti manah lebuh nyadi perintah. Rayat udah nemu enggau chara perintah GPS megai sebedau tu, mayuh janji sida enggau Sarawak enda dikenuku ti baka royalti 20 peratus minyak enggau gis enggau 50 peratus cukai belanja ulih ari Sarawak ti deka dipulaika ngagai Sarawak baru, kelimpah ari projek besai Sarawak ti dikinsil.

Tembah mega sekeda pengari rayat Dun ari parti DAP enggau PKR udah ninggalka parti sida.

Rayat sedar enggau Kepala Menteri kitai ti udah mandangka chara nyadi ketuai ti ulih mai pemansang Sarawak enggau nyaga pengelikun rayat.

Rayat ulih meda enggau mayuh projek udah dikinsil PH sebedau tu baka Jematan Rambungan, Jematan Kemena enggau Jematan Batang Paloh diatu benung digaga enggau dibelanja penuh ari Perintah Nengeri Sarawak.

Pia mega enggau projek ai enggau kuasa karan; YAB Kepala menteri ngembuan juluk ati ti deka nyapai 100 peratus ngagai selampur nengeri enggau meri agih belanja bejuta ringgit kena bejalaika projek.

Kelimpah nya, Abang Jo mega deka numbuhka Ejensi Pemansang Hulu Rejang (URDA), Ejensi Pemansang Wilayah Utara (NRDA) engga Ejensi Pemansang Tanah Tinggi (HDA), Integrated Regional Samarahan Development Agency (IRSDA), Ejensi Pemansang Sri Aman (SADA)- nengah agih belanja ti besai ungkup ba pengawa ngangkatmanah enggau ngelengkaska pemansang insfrustruktur enggau utiliti.

Berindik enggau nya, Perintah Nengeri bisi mayuh program pengintu pengelantang dikena nyaga raban ti seranta. Juluk ati YAB Kepala Menteri kitai deka nyaga enggau negapka hak sereta pengelikun rayat.

Rayat ulih meda Perintah Nengeri GPS bendar mantu enggau nuntut hak Sarawak.

Kepenudi, nama dikearap Datuk Amar ungkup penyereta ba Konvensyen Khas tu?

Juluk ati aku ba konvensyen tu deka nyediaka enggau meri motivasyen ngagai kaban parti ti deka nyapai objektif parti enggau menang ba pengawa bepilih ti deka datai.

Kedua, aku arap bala penyereta ulih bekunsika penerang ti ngaul polisi enggau program perintah sereta isu politik ba renggat nengeri enggau perintah besai. Aku ngarapka sida ulih ngerembaika penerang ngagai rayat ba renggat baruh kelebih agi kaban parti.

Nya alai, aku arap konvensyen tu deka ngenegapka kerejasama, pengelikun enggau sukung ti tegap ngagai Kepala Menteri kitai awakka terus ngiring nengeri Sarawak.