KUCHING: Taja balat kena pangka pengerekai Covid-19 tang Serikat Hornbill Networks Consortium Sdn Bhd berani ngelaban pemar nya.

Menteri Muda Dagang Entarabansa enggau Industri, Terminal enggau Pemansang Orang Dagang Datuk Mohd Naroden Majais muji penyakah serikat tu dalam meri empas ti positif ngagai mensia mayuh.

“Taja serikat tu agi mit, tang dagang iya udah meri pangka ti positif ngagai mensia mayuh.

“Siti ari dagang sida ti beguna iya nya ba sektor ngaga rumah ulih diempu ti dikumbai rumah Sri Pertiwi,” ku iya.

Iya bejaku munyi nya ba Pengerami Ngelancharka Opis Hornbill Networks Consortium Sdn Bhd enggau Projek Rumah Ulih Diempu Sri Pertiwi Samariang Avenue di Gala City ditu, kemari.

Ku Naroden, maya pengerekai penyakit Covid-19, industri ngaga rumah entara industri ti balat pedis.

“Sigi amai, industri ngaga rumah endang balat kena pangka, tang aku muji Serikat Hornbill Networks Consortium Sdn Bhd laban sida berani napi pemar tu.

“Tu siti kelai ngagai industri ngaga rumah bukai ngambika enda kakang ati neruska dagang sida.

“Pia mega, tu siti tanda ekonomi menua kitai udah mupuk suman belubah,” ku iya.

Iya ngarapka serikat nya terus ngaga pengawa pengabis manah dikena ngelaban pangka negatif ketegal Covid-19.

Dulu ari nya, Tuai Direktor ti mega Ketuai Pemesai Eksekutif Serikat Hornbill Networks Consortium Sdn Bhd Hanizam Hashim madahka taun tu endang taun ti balat mar ngagai sida bejalaika dagang ngaga rumah laban Covid-19.

“Kami begempung ati, enda putus pengarap sereta enda ngetu besampi ngagai Tuhan ngambika ulih menang napi penguji.

“Lalu ke sehari tu, kami ulih ngelancharka projek keterubah iya nya rumah ulih diempu Sri Pertiwi Samariang Avenue,” ku iya.

Kenu ku iya, rumah Sri Pertiwi Samariang Avenue ngembuan 90 unit bepalan di Jalai Sultan Tengah, Petrajaya, Kuching.

“Pia mega, kami ngarapka serikat tu ulih ngelancharka renggat kedua projek nya kena Jun taun baru.

“Ngarapka projek tu ulih meri rumah ti bekualiti sereta pengelantang ngagai rayat Sarawak,” ku iya.

Ungkup penerang kereja ngaga rumah Sri Pertiwi Samariang Avenue nya dipelaba deka bepun Oktober tu ila.

Rumah nya bisi 90 unit ke alai 60 unit rumah setingkat, 28 unit rumah dua tingkat enggau dua unit rumah begembar setingkat.

Rega rumah nya dijual bepun ari RM270,000 lalu dipelaba tembu bulan November 2022.