KOTA SAMARAHAN: Program Kenyalang Gold Card (KGC) ba menua pesisir nerima timbal ti positif ari raban orang tuai.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit
Datuk Seri Fatimah Abdullah madahka timbal tu berupai dipeda ari penyampau peminta ba Bantu Pengasih Rabat (BIK).

“Orang tuai ba menua pesisir meri timbal ti positif ngagai KGC kelebih agi ba BIK.

“Tang kitai andalka pemegai kad ulih ngasaika mayuh penguntung bukai lebuh meli barang ba makit baka diskaun, rebat enggau ke bukai,” ku iya.

Fatimah bejaku munyi nya lebuh ditanya pemberita ba Program Ngelawa Pasar Besai H&L di Aiman Mall ditu, kemari.

Ku iya, diskaun tiket bilun bedau diberi agi laban sida nemu pangka pengerekai igi penyakit Covid-19 ngagai industri penerebai bilun.

“Diskaun tiket bilun bedau bisi, tang diskaun tiket bas udah bisi.

“Bisi sebuah kompeni bas meri sepuluh peratus diskaun tambang ngagai pemegai KGC ti deka mindah ba selampur Sarawak.

“Sepuluh peratus diskaun deka ditambah agi nyema pemegai KGC numpang bas nya beraban,” ku iya.

Taja pia, Fatimah madah opis menteri iya deka berandau ngagai serikat penerebai bilun pasal diskaun tiket bilun ungkup pemegai KGC lalu ngarapka timbal ari serikat nya posistif.

“Diatu, industri penerebai bilun bedau suman nya kebuah kitai nemu pemar ti ditapi sida,” ku iya.

Iya mega meri terima kasih ngagai H&L laban ti sanggup nyadi bakih kunsi ngagai KGC ti dipejalai perintah.

Dulu ari nya, Direktor H&L Retail Sdn Bhd Bong Fook Kin madahka entara pekara ti diberi ngagai pemegai KGC lebuh meli barang ba pasar sida iya nya nyadi raban H&L pechuma, voucher hari pengada sereta diskaun bukai.

Sama bisi datai Skretari Mendam Opis Menteri Pengintu Pengelantang Orang Indu enggau Komuniti Dr Saadiah Abdul Samad sereta ke bukai.