KOTA SAMARAHAN: Raban nembiak di menua pesisir patut dilatih bemain e-lumba ngambika nemu pasal guna teknologi digital.

Menteri Muda Nembiak enggau Lumba Datuk Snowdan Lawan madahka raban nembiak di menua pesisir agi pabu penemu sereta enda kala meda palan endur bemain e-lumba baka Virtual Park.

“Ba Dun pegai aku empu (Dun Balai Ringgin), aku empu deka ngatur mai 100 ke 200 iku orang biak menua pesisir din raun kitu meda kediri nama palan ti dikumbai Virtual Park.

“Nyangka sida kala meda dalam televisyen tauka telefon enggau ke bukai tang nya enda asai kitai empu ngasai peneleba bemain kediri,” ku iya.

Iya bejaku munyi nya lebuh ditanya pemberita ba Program Walkabout Santai E-Lumba Begulai Enggau Menteri Muda Nembiak enggau Lumba di Virtual Park seharitu.

Nangkan nya, Snowdan meransang bala gerempung enggau kelab e-sport bukai ngambika begempung enggau Gerempung Lumba Elektronik Sarawak (SESA) lebuh deka ngatur pekit.

“Kitai nemu bisi gerempung enggau kelab e-lumba mit ngaga pekit lumba tu, tang kitai meransang sida ngatur lumba tu ba baruh payung SESA awakka lumba nya nerima pangka positif.

“SESA ulih ngembing, meri bantu enggau ngelalau sida dalam lumba tu laban gerempung tu besai sereta diaku opis menteri kami.

“Nyema sida meri kerejasama opis menteri kami ulih meri bantu belanja nengah SESA,” ku iya.