BAU: Perintah Nengeri ke dipegai Gempung Parti Sarawak (GPS) mandangka pemujur ba pengawa ngemansangka menua, ku Datuk Seri Nancy Syukri.

Menteri Dagang Temuai, Seni enggau Main Asal Malaysia nya mansutka pekara tu lebuh meri licha ba pengawa Lan Berambeh di Balai Mensia Mayuh Batu Kitang, Kemari.

“Perintah GPS udah mandangka penyikar sida ti ulih ngenanka penuduk lebuh napi penanggul nyadi penyakal lebuh perintah Pakatan Harapan (PH) menang ba pengawa bepilih besai.

“Nya kelai perintah GPS agi tegap napi penanggulnya nyentuk pegai perintah Perikatan Nasional (PN) diatu,” ku iya.

Nancy madah, rayat Sarawak mayuh bulih pemaik ari perintah GPS baka pemansang deka ditampung baru pengudah diketu perintah ke dulu enggau mayuh nguna sumber diri empu kena mantu rayat Sarawak.

“Kami ulih mansik mayuh peranak menua tu nadai ngembuan bekal ai ti beresi enggau nadai elekterik.

“Nya alai, Kepala Menteri Datuk Patinggi Abang Johari Tun Openg mujur mutarka penusah tu enggau meri pemansang insfrstruktur enggau perengkaguna pemun.

Nancy mega enda nyakal bisi piak parti bukai nguji mutarka penanggul tu nyadika isu sida.

“Sigi bisi piak parti bukai madahka Sarawak agi tinggal di belakang ari sukut pemansang taja umba Sarawak tu nengeri ti besai,” ku tandu iya.

Berindik enggau nya, Perintah Nengeri udah meri agih belanja ngagai selampur rayat Sarawak ti penyampau urung RM2.5 juta ti udah dipelanja perintah kena mantu rayat.

“Lebuh napi penusah ketegal pengerekai penyakit Covid-19, Perintah Nengeri agi tegap taja napi penusah tu ti ngujungka ulih ngumpul belanja penyampau RM260 juta ungkup mantu selampur rayat.

“Nya siti ti mandangka Perintah GPS tegap lebuh napi penusah nya,” ku iya.

Nancy mega ngelalau semua raban pengari rayat bela besaup ngemansangka sitak diri empu laban mayuh palan ti ngembuan penau ti besai dikemansang.