KUCHING: Terais leka panjung “Agi Idup Agi Ngelaban” nyadi pemungkal dikena aku ngangauka kami sebuat ngepunka pengawa betimbak ngelaban munsuh”, ku Ex- Sarjan Dajai anak Anggie.

Dajai nusuika cherita bakani sida sebuat berambunka nyawa ngetanka menua lalu mujur ngalahka munsuh tajapan sida sebuat semina betubuh 17 iku betempur enggau lebih 20 iku munsuh dalam siti operasyen ba kandang menua ke dipegai Rascom kelia.

“Maya nya kami mujur munuh lima iku munsuh lalu ke bukai dipelabaka mayuh bakal sereta ngelarika diri.

“Bala komunis nadai ngadang bala kami ulih idup beduduk ari langkau endur kami ngenduh kena bom munsuh lalu meletup.

“Dulu agi ari kami bendar betimbak nguji ngalahka pangan diri. Puji Tuhan, raban ke diuluka aku maya nya menang ngalahka munsuh. Nya alai, berekat ari nya aku terus diberi pangkat Panglima Gagah Berani (PGB),” ku lansa Sarjan Dajai nengah sebengkah penerang nuju Suara Sarawak.

Nangkan nya, siku agi penerima Pingat Gagah Berani, Mejar (B) Michael Riman mega nusui iya kala nyereta operasyen lalu betimbak enggau munsuh ba Bukit Korbu Perak.

“Laban ke ngena baju panjai sereta tebal dia aku nadai tentu berasai lebuh peluru masuk tubuh maya kena timbak munsuh.

“Enda lama udah nya baru ngasaika lengan kanan pedis sereta tepedaka darah pansut ngemasahka baju bekau kena timbak.

“Maya nya baru nemu leka peluru udah inggap ba tulang lengan. Dulu ari nya, aku baru udah nimbak siku indu komunis ti udah bakal ditimbak, indu nya baru deka narit senapang iya dikena nimbak aku tang seninjik endar aku dulu meda lalu enda jugau aku terus ngachitka senapang aku”, ku Riman mulaika kenang iya maya agi gawa nyadi Soldadu Renjer munaska komunis di Malaya taun 1970 an kelia.

Berita penuh Ruai 3 pagila.