KUCHING: Bisi dua kes baru udah suman sereta dikemendar pansut ari Sepital Bintulu dirikod ba Sarawak seharitu.

Komiti Penyangga Penusah Ngenyit Nengeri (JPBN) ba penerang media madah, ari rikod nya ngujungka penyampau kes suman sereta dikemandar pansut ari sepital di menua tu nambah 676 iku.

Ku JPBN, nadai kes positif baru Covid-19 dirikod seharitu ngujungka penyampau kes positif di Sarawak mengkang 699 kes.

Taja pia, Kluster Alam di Bintulu agi mengkang lapan kes ke alai tujuh kes udah suman sereta dikemandar pansut ari sepital seraya siti kes agi diperubat ba Sepital Bintulu.

Nangkan nya, JPBN madahka bisi empat iku agi diperubat ba wad isolasyen sepital iya nya dua ba Sepital Bintulu, siku ba Sepital Besai Sarawak enggau siku ba Sepital Miri.

Penyampau kes pemati ketegal dirampit Covid-19 di Sarawak mega mengkang 19 iku ke alai emari bisi 15 pesakit agi dipatau (PUI) baru dirikod.