KOTA SMARAHAN: Dua penanggul ti nekul e-lumba lubah diterima bala nembiak menua pesisir.

Menteri Muda Nembiak enggau Lumba, Datuk Snowdan Lawan madah, tiang pemanchar enggau suwa serikat telekomunikasyen dikelala nyadi pun penanggul nya nyadi.

Ku iya, Kepala Menteri Datuk Patinggi Abang Johari Tun Openg udah meri agih belanja dikena nirika 300 buah tiang pemanchar selampur Sarawak.

“Tiang pemanchar nya tebal agi deka didiri ba kandang menua pesisir laban kitai endang fokus ngagai menua nya.

“Taja pia, pemisi tiang pemanchar ukai jamin ‘signal’ tauka arus penyambung ulih datai kia ketegal bisi penanggul bukai ti enda ulih diseliah,” ku iya.

Snowdan bejaku munyi nya lebuh dirandau ba Program Walkabout Santai E-Lumba Begulai Enggau Menteri Muda Nembiak enggau Lumba di Virtual Park ditu, kemari.