BAKUN: Jalai alternatif 12 kilometer (km) pemanjai ngelawa Tasik Bakun enggau perambu ngaga jelatung ba tasik nya disadang tembu Oktober 2021.

Sapit Kepala Menteri Tan Sri James Jemut Masing madah, kededua projek nya dipejalai enggau ungkus RM47 juta (jalai alternatif) enggau RM17 juta (jelatung).

Ku iya, renggat kedua projek nya deka mungkur perengkaguna mensia mayuh enggau kedai dikena nangkup peminta orang berikan ba kandang menua ulu Bakun.

“Aku ngarapka kandang tasik Bakun ulih diangkat nyadi palan matih atlit Sukma Sarawak ungkup pekit belayar.

“Nya kebuah besai amat pengandal aku ngagai Opis Menteri Nembiak enggau Lumba ulih dibai meda menua tu ngambika Kelab Layar Bakun (Bakun Sailing Club) ti udah diperambu deka bisi opis ti disikap meruan,” ku iya.

Masing mansutka jaku nya nengah sebengkah penerang berita ditu, tadi.

Iya madah, penyikap perengkaguna ba opis nya ila beguna amat dikena matih empu atlit sida.

Masing ti mega Menteri Infrastruktur enggau Pemansang Penyangkai Kapal madah, mayuh endar pengulih ba menua Bakun ulih dikemansang.

“Kelimpah ulih nyadi palan ditapatka temuai baka lumba ai, kitai ngarapka menua tu nyadika pematak dagang temuai di Sarawak,” ku iya madah nyemetak.

Ari pemesai kandang tasik ke bisi dia ku Masing, tentu ulih matak pelajar napatka Tasik Bakun endur sida belajar kelimpah matak bala temuai nemuai ke kandang menua ulu ti agi ayung kampung asal.