KUCHING: Mensia mayuh dipinta seruran mendingka penerang bekaul gaya hari enggau penusah ampuh bah ti ditabur ba stesyen radio enggau ba media rama.

Direktor Opis Bomba enggau Penyah Penusah Malaysia (JBPM) Negeri Sarawak, Khirudin Drahman madah, nya sebagi ari chara sida nyikap diri napi sebarang penusah ke enda disadang nyadi.

“Peranak ti diau ba kandang menua baru enggau suah napi penusah ampuh bah, sida mesti beratika tikas peneras ai ba genturung pendiau diri.

“Pia mega, mensia mayuh ditangkan anang ngereja aktiviti memarin ba ai wong enggau tebing sungai dikena nyeliahka diri ari penusah rarat ditaban arus deras.

“Bala nembiak dilalau anang bemain ba endur ampuh bah baka parit, endur ngali, ai sungai enggau ke bukai ngambi nyeliah sebarang penusah ke enda disadang nyadi.

“Nya alai, apai indai enda tau enda nentuka anak sida likun belama,” ku iya nangkan.

Khirudin mansutka jaku nya lebuh dirandau Suara Sarawak bekaul chara piak bomba nyikap diri napi musim pengujan, ditu tadi.