KUCHING: Servis Lutur Terebai (FDS) ungkup Simanggang (Bagi Menua Sri Aman), Samarahan, Miri enggau Kapit deka berengkah dipejalai pagila nyentuk 18 September.

Nitihka penerang ari Opis Pengerai Nengeri Sarawak, servis tu deka dipejalai ba 30 buah rumah panjai ba empat bengkah bagi menua nya.

Ba Simanggang, raban FDS ngepunka pejalai ngelawa Rumah Rimong Begantung, Ulu Skrang, Rumah Siba Perdu enggau Ulu Spak ungkup pagila.

Hari siti (11 September), sida deka nampung pejalai ngelawa Rumah Bada, Tekalong enggau Ulu Engkari lalu ditangkan Nanga Bawi enggau Ulu Lemanak kena 14 September.

Kena 17 enggau 18 September, raban lutur terebai deka ngelawa tiga genturung pendiau di Samarahan iya nya ba Plaie Atas, Pendawan enggau Sekula Primari (SRK) Tuba Tengah.

Ba Miri, servis tu deka bejalai ngagai Ba’Laman kena 11 September, Tanjong Durian (15 September), Ba Abang (17 September) enggau Long Tebangan (18 September).

Ba Kapit, raban FDS deka ngelawa Rumah Berangan enggau Rumah Sari kena 11 September, Long Singut (14 September), Rumah Achau enggau Rumah Nyelang/Sibat (15 September), Rumah Tedong (17 September) enggau Long Unai (18 September).

Ungkup penerang silik bekaul servis FDS tu, mensia mayuh dipinta telefon ngagai Penulung Pemesai Perubat Kanan ba Unit Pengerai Sem Baling ba lumur 082-473268 tauka 016-5725040.

Nya alai, peranak ba menua pesisir enda tau enda ngerebut peluang beperesa pengerai kita.

Ku penerang nya, servis FDS tu sebagi ari chara perintah nyaga pengelantang peranak ba menua pesisir.