KUCHING: Ulah makai suap nya salah ba sektor gawa perintah, ku Sekretari Mendam Menteri Betanam Betupi Moden, Tanah Adat enggau Pemansang Kadang Menua (Manred), Edwin Abit.

Ku iya, tuju pengawa sehari nya dikena ngenegapka integriti enggau penau orang gawa perintah ti semampai dibalut isu penyalah makai suap.

“Kami meri fokus ngagai integriti enggau pemesai guna iya kelebih agi penusah tau nuntung enti sema malut diri enggau pengawa makai suap.

“Integriti tu ke ‘dinding bulu’ kita maya gawa bepelasarka polisi perintah ti minta kita nyeliahka diri ari ngereja penyalah baka tu,” ku iya.

Edwin madah munyi nya lebuh meri licha keterubah ba pengawa Hari Intergriti Manred ba sebuah hotel tebilang ditu, tadi.

Iya madah, perintah diatu beratka isu intergriti orang gawa perintah ngambika sida likun ari ngereja sebarang ulah ke tau ngujungka sida dibuai kereja.