KUCHING: Sarawak ngerikod siti kes baru positif Covid-19 ba Pelilih Sibu, seharitu.

Sekretariat Komiti Penyangga Penusah Ngenyit Nengeri (JPBN) Sarawak madah, tu ngujungka kes positif Covid-19 di Sarawak nambah ngagai 700 kes naka seharitu.

Ku penerang JPBN, kes baru nya kes import siku peranak menua ti baru pulai ari Singapore.

Iya gawa nyadi injinir ba sebuah serikat injinir tasik enggau luar pesisir dunya di Singapore enggau sangkai ba Padang Bilun Entarabansa Kuching (KIA) kena 6 September tu tadi.

Lelaki tu udah dianjung ngagai palan kuarantin sebedau dikenedar nampung pejalai ngena bilun ngagai Sibu kena 7 September.

Ba Sibu, iya udah dibai ngagai palan kuarantin hotel ungkup dikuarantin pengelama 14 hari.

Ba hari kedua kena 8 September tu tadi, iya ditemu positif Covid-19 pengudah beperesa Covid-19 enggau peresa rT-PCR.

Taja pia, JPBN madahka lelaki nya nadai mantaika sebarang kelai kena rampit Covid-19 lalu dipasuk ngagai Sepital Sibu ungkup atur bukai.

Nitihka penerang, lelaki tu bisi bejalaika swab test dua minggu sekali ba endur iya gawa di Singapore.

Lelaki nya ditemu negatif Covid-19 lebuh kepenudi beperesa ba Singapore kena 4 September tu tadi.

Kes tu agi dipansik enggau pengawa nyidi kaul kes mega benung chakah dipejalai.