MIRI: Peranak Miri begau pengudah tetemuka gis tulen tauka gis ari baruh tanah ba palan lama telaga minyak ti ditinggal ba Bukit Kanada ditu.

Nitihka penerang, gis ti ditemu tu matak perati mensia mayuh nyengkaum Menteri Muda Dagang Temuai, Seni enggau Main Asal Datuk Sebastian Ting.

Nengah sebengkah penerang ba Facebook iya, Sebastian berasai gagit enggau gaga enggau berita nya taja apin ditemu bansa gis.

Ku Sebastian, iya deka ngabas telaga minyak nya pengudah pulai ngulu Pengerami Hari Malaysia ti diatur ba Sibu.
Kena Hari Minggu tu tadi, siti video dirakam seraban orang ti niki bukit udah tetembuka gis baruh tanah nya ayan sebelah media rama.

Beduduk ari nya, atur bukai deka dipejalai ngambi nyaga pemansut enti sema nya amat gis baruh tanah.
Nambahka nya, Sebastian ngelalau mensia mayuh bejejaga lebuh ba endur nya laban enda ditemu sekalika gis nya tau nganu nyawa tauka enda.

Bukit Kanada endang ditemu ngembuan minyak enggau gis tulen kenyau ari telaga minyak keterubah ba Sarawak enggau Malaysia, Grand Old Lady ditemu ba taun 1910.

Kenyau ari nya, Grand Old Lady nyadi palan ngali minyak mata nyentuk taun 1962.