SIBU: Makit Sibu nyadi tamu keterubah ba menua tu ti ngena aplikasyen Sarawak Pay.

Urung 70 peratus ari 1,170 pedaja diau udah rejister Sarawak Pay ngambi ngemuntang sida ti meli sayur dia.

Pemansang teknologi ti majak nambah ngujungka Perintah bejalaika inisiatif ngena sistem bayar e-wallet, Sarawak Pay ke muntang agi kelimpah sistem nya bepengulih besai dikerembai dudi hari.

Kepala Menteri Datuk Patinggi Abang Johari Tun Openg madah, perintah keran bejalaika inisiatif nya ngambi meransang rayatngena teknologi baru ba pengidup sida.

Ku iya, inisiatif nya ngujungka rayat sedia napi ubah pemansang dunya digital ti nyadi pemungkal pemansang Sarawak.

“Kitai sedarka inisiatif tu ukai muntang dikereja lalu begunaka timpuh tang perintah andalka inisiatif tu ulih dijapai.

“Inisiatif tu udah nyadi nyata lalu rayat nerima manah pekara tu kenyau ari aplikasyen Sarawak Pay dipejalai ba menua tu,” ku iya.

Abang Johari mansutka jaku nya ba pengawa bejadika Aplikasyen Sarawak Pay enggau Arus WiFi Pechuma ba Mait Sibu, ditu kemari.

Iya mega madahka Sarawak Pay nya entara inisiatif perintah meransang mensia mayuh ngena chara ‘cashless’ lebuh dunya majak mansang ngagai teknologi nadai adan tu.

Ku iya, kenyau ari aplikasyen tu dilanchar ba bulan November 2017, Sarawak Pay diatu ngembuan 433,396 penguna enggau 64,254 pedagang berejister ba selampur Sarawak.