KUCHING: Sarawak seharitu ngerikod siti kes import ngaul siku injinir indu peranak menua datai ari Cheras, Selangor ditukuka positif ngujungka naka tu bisi 701 kes dirikod.

Indu nya datai ari Kuala Lumpur enggau udah dipasuk ba Sepital Sungai Buloh, Selangor ungkup atur bukai ba hari ti sama.

Nitihka penerang ari Sekretariat Komiti Penyangga Penusah Ngenyit Nengeri (JPBN), indu nya sangkai ba Padang Bilun Entarabansa Kuching (KIA) ari Padang Bilun Entarabansa Kuala Lumpur (KLIA) kena 14 September tu tadi.

“Kes udah diperesa swab rT-PCR Covid-19 di KIA lalu indu nya datai kitu laban bisi pengawa enggau semina diau ba Sarawak pengelama dua hari aja.

“Lebuh ba Kuching, indu nya bemalam ba sebuah hotel enggau sampel swab udah diambi sereta ditukuka positif lebuh beperesa rT-PCR kena lemai 16 September tu tadi,” ku penerang nya.

Nambahka nya, indu nya nadai mantaika kelai kena rampit Covid-19 lalu ditemu kena rampit sebedau tama kitu.
“Kes mega enda kala bejalai ngagai menua luar lalu kebuah iya kena rampit agi dipansik.

“Pengawa nyidi kaul kes agi dipejalai,” terang iya.

Pia mega, JPBN madahka Kluster Alam ba Bintulu ti agi ngerekai ngaul lapan kes.

“Semua kes dalam kluster tu mega udah suman enggau dikemendar pansut ari sepital lalu nadai kes baru udah suman enggau dikemendar pansut ari sepital kemari.

“Tu ngujungka kes positif Covid-19 ti udah suman enggau dikemendar pansut ari sepital mengkang 680 iku tauka 97.00 peratus,” tandu iya.

Kes ti agi diperubat ba wad isolasyen nambah dua iku iya nya bela siku ba Sepital Sibu enggau Sepital Sungai Buloh, Selangor.

Kes pemati mengkang 19 iku tauka 2.71 peratus naka kemari lalu lima kes PUI baru diripotka enggau nadai kes PUI nganti pemutus makmal.