SARATOK: Pemansang pelajar sekula enggau pengelantang nembiak seruran nyadi fokus Sapit Menteri Pengeluar Kuasa enggau Pengeraja Asal, Ali Biju.

Iya ti mega Kaban Parlimen Saratok madah, peminta belanja ari sekula ba sitak nya endang diberi perati lalu sekeda peminta udah dirumban.

Ku iya, pekara nya beguna amat nentuka sekula nyadi palan ti likun enggau lantang endur bala nembiak ngiri penemu, penau enggau pengelandik kena idup.

“Pemansang sekula tu ukai semina ba pekara pelajar aja, tang penyikap perengkaguna enggau pengawa ke bisi dipejalai sekalika ngaul bala staf, pengajar enggau apai indai.

“Aku naka ulih nangkup peminta ari sekula nentuka pengawa enggau aktiviti pemansang ti udah dilanggur ulih dipejalai enggau lanchar. Nya alai saup mih aku ngatur enggau ngemujurka juluk ati tu nyadi nyata.

“Aku mega nemu mayuh perambu udah dibantai bala kita lebuh baumka pekara pemansang sekula enggau pelajar bala nembiak laban genap pekara enda tau enda diperati silik.

“Tu nunjukka pekara ti manah laban bisi kerejasama entara PIBG enggau piak sekula dikena ngemaju enggau berundingka pengelantang bala anak besekula dia.

“Pekara baka tu dikedeka kitai, semua piak besaup gawa, berunding enggau mansutka anak penemu pasal pekara pemansang sekula,” ku iya lantang ati.

Jaku Ali disebut pengari iya, Pengajar Walter Changgai rambau pejalai nyuaka chek Projek Mit Pemansang Menua Pesisir (MRP) ngagai Serakup Apai Indai enggau Pengajar (PIBG) apin lama ke udah.

Sepenyampau RM32,000 udah diserah ngagai piak PIBG iya nya PIBG Sekula Primari (SK) Nanga Budu, Krian nerima RM10,000 lalu PIBG SK Lempa Kabo enggau PIBG SK Ulu Budu bela nerima RM7,000 seraya PIBG SK Klua, Krian nerima RM8,000.

Ba lansa sama, tim Ali Biju mega udah nampung pejalai ngabas seraya nyuaka chek MRP ngagai Biro Indu Rumah Punggah, Temudok di Krian enggau Komiti Pemansang enggau Pengelikun Genturung Pendiau (JKKK) Rumah Noel, Semurin ditu.

UNGKUP PENGELANTANG SEMUA… Ali diarika Pengajar Walter Changgai nyuaka chek ngagai Chairman PIBG SK Ulu Budu, Gena Unding seraya bala bukai ngemata.

 

KEREJA UTAI KE PATUT… Stanley ngarika Ali nyuaka chek ngagai Chairman PIBG SK Klua, Chendang seraya dikemata Kepala Pengajar sekula nya, Roslan Drahman.