KUCHING: Miss Universe Malaysia 2020 Francisca Luhong James pulai ke Sarawak kemari penggudah seminggu lebih menggi gelar nya.

Dara bajik penakan Iban, Kayan enggau Kenyah tu lebuh dirandau madahka diri asai ke enda pechaya menggi gelar Miss Universe Malaysia 2020.

“Aku berasai chukup temegah laban udah ngarika Sarawak ba pekit pemajik gamal tu.

“Diatu pengidup aku berubah baka dani pukul empat pagi enggau nganta sebedau mindah ke bukai,” ku iya.

Iya bejaku munyi nya ba Program Ngelaluka Penatai Miss Universe Malaysia 2020 Francisca Luhong James di sebuah restoran, ditu tadi.

Ku Francisca, taja udah menggi gelar nya tang iya endang deka seruran begulai enggau semua orang ti udah meri sukung ngagai iya ngelama tu.

“Enda ngira dini alai aku diau, aku nyaga ulah diri empu, semampai ngemaruhka diri baka selama.

“Juluk ati aku endang deka negapka orang indu nyadi ketuai ti berani jemah.

“Aku mega ngarapka ba pekit nangkan tu (International Miss Universe), aku ulih mai enggau ngemegahka nama Malaysia ba tikas tinggi agi,” ku iya seraya tuchum manis.